DUHA ka mga bag-ong kaso sa Covid-19 ang natala sa dakbayan sa Talisay, Huwebes, Mayo 28.
Si Talisay City Mayor Gerald Anthony Gullas, Jr. nipahibalo nga ang duha ka mga bag-ong kaso gikan sa Barangay Tanke ug Barangay Dumlog.
Unang bag-ong pasyente ang nag-edad og 66 nga babaye nga taga Tanke. Kini nasulod sa Vicente Sotto Memorial Medical Center (VSMMC) niadtong Martes, Mayo 26.
Si Gullas nagkanayon nga gisusi na usab ang pamilya sa pasyente labina ang kauban sa pagpuyo sa balay. Ipaubos sila sa swab test.
Samtang, usa ka 25 anyos nga lalake sa Dumlog maoy ikaduhang pasyente sa Covid-19. Usa siya ka kawanni sa usa ka ospital sa dakbayan sa Sugbo.
Matod ni Gullas, ang mga pasyente nibati og simptomas sama sa influenza ug gipaubos sa swab tests sa VSMMC.
Gikontak na nga ilang tagsatagsa ka pamilya ug ang pasyente ibalhin sa pasilidad sa dakbayan alang sa positibo sa Covid-19.
Sa pagkakaron, ang Talisay adunay 46 ka kaso sa positibo sa Covid-19 uban sa 6 nga namatay ug duna ang naayo. (JCT)