LAING hugna sa 162 ka Overseas Filipino Workers (OFWs) nga natanggong sa Manila tungod sa Covid-19 lockdown, ang ning-abot sa puwerto sa dakbayan sa Sugbo, Martes sa gabii, Mayo 28.
Ang 93 niini taga Sugbo ug ang 69 molahos sa dakbayan sa Cagayan de Oro sa Mindanao.
Si Lieutenant Junior Grade Erick Salcedo, tigpamaba sa Philippine Coast Guard District Central Visayas (PCGDCV), nagkanayon nga ang mv St. Francis Xavier sa 2Go Shipping mao ang ilang gisakyan nga nibiya sa puwerto sa Manila niadtong Miyerkules, Mayo 27, alas 10:30 sa gabii.
Ug human gipakanaug ang 93 ka OFWs sa Sugbo, pasado alas 9:00 sa gabii, ang samang barko nilahos sa paglawig sa Cagayan de Oro.
Sa ulahing resolusyon nga giluwatan niatong Miyerkules, Mayo 27, ang Inter-agency Task Force (IATF) for the Management of Emerging Infectious Disease niawhag sa Department of the Interior and Local Government (DILG) sa pagpahinumdoam sa local government units bahin sa ilang responsibilidad sa pagdawat sa OFWs nga negative RT-PCR test aron makauli sa ialng balay ug mopaubos sa home quarantine.
Ang RT-PCR test o reverse transcription polymerase chain reaction tests pagahimuon sa pinaagi sa swab sample gikan sa ilong ug tutunlan sa pagsusi sa novel coronavirus, o Sars-CoV-2, diin mao ang hinundan sa Covid-19.
Niadtong Mayo 23, duha ka mga barko sa 2GO ang gisakyan sa 475 sa OFWs padulong sa Sugbo gikan sa Manila.
Dunay 240 ka OFWs sakay sa mv St. Michael the Archangel ug 235 sa mv St. Francis Xavier.
Niadtong Mayo 21, Huwebes, ang Philippine Coast Guard (PCG) nipahibalo nga 14,669 OFWs sa nagkalainlaing quarantine centers ang giisyuhan og quarantine clearance human nagnegatibo sa novel coronavirus ug nakakompleto sa mandatory 14-day facility-based quarantine. (WBS)