SUPERBALITA CEBU

Covid-19 laing panid sa pagsuway ni Gorres

BALIK-LANTAW. Mga hulagway sa kanhi sikat nga boksidor sa Sugbo nga si Z Gorres niadtong iyang panahon ug ingon man sa kalit ug wala damha nga pagtuldok sa iyang boxing career, lakip niini mao ang pagpakigkita ni Filipino boxing superstar Manny Pacquiao pila ka adlaw gikan iyang pagkahitabo. (File Photo)

HUMAN magusbat ang dagan sa iyang kinabuhi, laing hagit ug pagsuway na usab ang gilatas karon ni kanhi world title challenger ZC Gorres taliwala niining hudlat sa makalilisang nga coronavirus disease (Covid-19) sa tibuok kalibutan.

Si Gorres kinsa naparalisa niadtong tuig 2009 human sa iyang away batok ni Luiz Melendez didto sa Mandalay Bay sa Las Vegas, anaa na karon nanimuyo sa sitio Tabok-Lamak, Yati, lungsod sa Lilo-an uban sa iyang amahan.

Ang pag-abli og carenderia sa ilang dapit maoy nahimo nilang kapanginabuhian sanglit sa iyang kahimtang karon lisod na alang kaniya ang pagpangita og trabaho.

"Naa me carenderia. Arang-arang ang kita makasapar gyud. Pero pagsugod gyud sa Covid stop sa me. Na-unlod gyud ang among puhonan," matod ni Gorres atol sa online interview sa Superbalita Cebu.

"Taud-taud na sad ni. Mao gyud ni source of income namo sa ako papa kay wala na man koy mama ug buwag man me sa ako asawa," dugang pa niya.

Tungod sa kalisod sa panahon karon, ang paghuwat na lang og ayuda gikan sa gobiyerno maoy ilang gisaligan alang sa inadlaw nilang panginahanglan.

Kon unsa man kaniadto ang kalami sa pagkaon nga iyang matagamtam dako na ang kalahian karon.

"Sige lang ta'g lugaw ani, Sir. Gahapon naglugaw mi kay wala na man mi sud-an, ganiha ug ugma mao na sab siguro, lugaw gihapon," padayong saysay sa 35 anyos nga Gorres kansang upat ka anak (3 ka lalaki ug 1 ka babaye) atoa ra usab sa iyang asawa nga maoy nagpuyo sa ilang balay sa dakbayan sa Mandaue.

Ang pagpaabang og tipik sa luna sa ilang balay mao usab ang gisaligan sa iyang asawa uban sa upat nila ka mga anak. Giangkon ni Gorres nga hangtod karon padayon siyang nagdawat og allowance gikan sa Ala.

Nagpanuigon og 18 anyos ang iyang kamaguwangan nga lalaki samtang 10 anyos usab ang kamanghuran.

Apan ning uwahi lang, gihamok usab ang iyang pamilya og laing kalisod human nalakip sa pagkaugdaw sa sunog ang ilang balay sa Mandaue.

"Walay work siya (asawa). Nagsalig to siya sa una naa mi paabangan. Unsaon naugdaw gyud tanan. Wala lagi. Hasta ko. Wala sad gyud. Pait kaayo amo puhonan sa amo carenderia hurot gyud."

Pero bisan pa niining ilang kahimtang karon, wala mawad-i sa paglaom si Gorres. Sama niadtong aktibo pa siya sa iyang pagpamoksing, way hatagi niya og luna ang pagsurender.

Padayon niyang gipanglantaw sa unahan nga kining laing kalisdanan nga iyang naangkon karon aduna ra gihapoy katapusan.

Nobiyembre 13, 2009 ang petsa nga wala damha mao na diay ang magtuldok sa iyang karera. Midaog si Gorres pinaagi sa unanimous decision batok sa Colombian fighter nga si Melendez kinsa niadtong higayona adunay record nga 30-2-2.

Pila lang ka minutos human gideklarar nga mananaog, kalit nga nalup-og si Gorres ug gidala gilayon kini haduol nga tambalanan .

Nasayran nga aduna kini blood clot sa wala nga bahin sa iyang utok nga naghatag og hudlat sa iyang kinabuhi.

Milanat og hataas nga mga adlaw ang pagpakigkombati ni Gorres aron mahaw-as sa peligrusong kahimtang.

Pebrero 24, 2007, gipanglantawan nga si Gorres maoy unang mahimong world champion sa Ala Boxing Gym sa dihang iyang gikasangka ang Mexicanong si Fernando Montiel alang sa WBO world superfly title sa Cebu City Sports Complex.

Apan miresulta kini sa controversial split decision nga kapildihan ni Gorres nga nakapasagmuyo atubangan sa iyang mabagang dumadapig.

Gikan niadto wa mapapas sa alimpatakan ni Gorres ang pagpanimalos sa kapildihan nga daw og sa dili madawat.

"Human ato duwaa (ni Melendez), rematch unta me ni Montiel. Sa Vegas duwaon. Planado na unta to tanan," sumpay-saysay ni Gorres.

Ang Gorres-Melendez fight nga maoy nag-awop sa boxing career sa usa sa mga lantip nga boksidor sa Sugbo nahitabo usa ka adlaw sa dili pa ang away nila ni Filipino boxing superstar Manny Pacquiao ug Miguel Cotto.

Gitapos ni Gorres ang iyang boxing career nga may dala nga 31-2-2 nga baraha.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph