Dear Noy Kulas,
Maayong adlaw ninyo. Ako si Arnel, taga Cebu City. Seaman unta ko, but wa na ko mosakay mga more than one year na. Wa na ko ganahi mosakay human nako masakpi ang akong asawa nga dunay laing lalake nga gikabuangan. Ang nakapait nikuyog pa siya, but na-timing man nga nauli ko nga wa siya kahibawo, akong naapasan sa ilang gipuy-an. Napugos siya og uli kay ako siyang gihulga nga sila ipapriso.
Ako siyang gipasaylo sa iyang gibuhat bisan sakit kaayo kay para nako tungod kay gihilabtan ug gitabastabas sa laing lalake, lisod na unta dawaton but ako man siyang love kaayo ug para sa among anak, ako siyang gidawat. Sakit kaayo bisan nangayo na siya nako og pasaylo.
Karon, hapit na mahurot ang akong tinigom sa akong pagsakay kaniadto. Kinahanglang mosakay ko og balik, but unsaon nako ang akong asawa? Di kaha ni molayas og balik, mag-uli sila adtong lalake Unsa akong buhaton? Tambagi ko.
ARNEL
Arnel,
Maayo kay nipatigbabaw ang imong gugma kaniya ug alang usab sa mga bata. Talagsaon ra kaayo ka nga pagka bana. Naa gani uban patyon gyud, apil na ang hinigugma. But ikaw, pareho ka sa ubang pipila ka mga bana nga ang gugma ug kaluoy maoy gipatigbabaw. Di baya lalim nang imong experience. Imo pang giapas kay imong natultolan.
Kon mobalik ka og sakay, 50-50 pa gihapon nga di siya makigbalik anang iyang kanhi bisan dugay na to. But for the sake sa imong mga anak, ayaw kahadlok. Lig-una ang imong kaugalingon. Ayaw kahadlok kon unsay mahitabo sa imong asawa. Ang lantawa mao ang imong mga anak nga duna silay maayong kaugmaon. Busa, pakigsulti sa imong pamilya ug pamilya sa imong asawa aron magkabuang na pud siya, naa silang tanan mosapupo sa imong anak.
Pagpundo og kwarta puhon aron makanegusyo ka, sa ingon di ka na mobalik pagsakay. Kon wa ang inahan, importante ang papel sa amahan. Ayaw lang kalimti ang pag-ampo kanunay nga hugot sa Ginuo.
NOY KULAS
rojval69@yahoo.com ug kulassuper@sunstar.com.ph