SUPERBALITA CEBU

Magpadayon sa pagkab-ot sa pangandoy

NAGKANAYON si University of the Visayas (UV) Green Lancers coach Gary Cortes nga iyang gitambagan ang iyang mga magduduwa nga padayong maggukod sa ilang tagsatagsa ka pangandoy taliwala sa pagkahunong sa kalibutan sa basketball gumikan sa coronavirus disease 2019 (Covid-19).

Pinaagi sa online chat, asoy ni Cortes nga iyang gitanom sa alimpatakan sa iyang mga magduduwa nga dili magpasagad sa kaugalingon ug padayong magpakondisyon aron dili mapusgay ang ilang mga pangandoy.

Dili ikalimod nga ning-us-os ang mga abaga sa varsity players sa Sugbo human nakadesisyon ang Cebu Schools Athletic Foundation Inc. (Cesafi) nga isuspenso ang tibuok 2020 season gumikan sa Covid-19.

"Karong panahuna, kinahanglan og emotional support ang atong players. Ako silang gitambagan nga padayong magpakondisyon para sa ilang pangandoy," matod ni Cortes sa pagpakighinabi ning mantalaan.

"Ako silang giingnan nga ang pagka-cancel sa Cesafi dili 'end of the world' sa ilang basketball career."

Gipasabot ni Cortes nga dili lang ang Cesafi maoy taytayan paingon sa pangandoy sa matag basketbolista nga taga Sugbo o nagbasi sa Sugbo.

"Dili ra man ang Cesafi maoy tournament nga makatabang nila aron maabot ang ilang pangandoy, naa pa man lain diha," dugang ni Cortes.

"Kinahanglan gyud nga kondisyon sila permi kay sa gusto nato ug dili, mobalik ra man gyud ning basketball. Wa man tuod Cesafi pero naa ra gyud nang basketball."

Giklaro ni Cortes nga sa higayon nga molurang na ang Covid-19 ug mahibalik na ang basketball, aduna siya'y mga plano aron padayong mahashasan ang abilidad sa iyang mga magduduwa bisa'g wala'y Cesafi.

Ang Green Lancers, many-time Cesafi champions, nakakaplag na sab og ubay-ubay nga mga magduduwa nga nakasabot sa Philippine Basketball Association (PBA) nga pangandoy sa matag Pinoyng basketbolista.

Malaumon si Cortes nga sa kasamtangang puwersa sa Green Lancers, aduna na sab laing makatungtong sa PBA kon magiyahan lang og insakto.

Sukad sa iyang paggunit sa Green Lancers, si Cortes nakaumol na sab og magduduwa nga adunay dakong potensyal nga makakulit og dakong pangalan sa PBA.

Gitumbok mao ang kanhi MVP sa Cesafi nga si Rey Suerte, kinsa kasamtangang sakop sa Gilas Pilipinas national pool.

Sa lima ka mga magduduwa nga gilista sa PBA special draft nga alang sa Gilas Pilipinas sa miaging tuig, si Suerte gipili sa Blackwater Elite isip No. 2 pick.

Hinuon dili pa makaduwa si Suerte sa Blackwater tungod kay ipahuwam pa kini sa Gilas Pilipinas program alang sa kampanya niini sa 2023 Fiba Basketball World Cup. (ESL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph