TULO ka mga bag-ong kaso sa coronavirus disease (Covid-19) ang natala lukop lalawigan sa Mayo 29, 2020.
Kini maoy resulta sa Covid-19 test sa 179 ka mga swab samples nga gisumiter sa probinsya sa Sugbo ngadto sa Vicente Sotto Memorial Medical Center (VSMMC), ang sub-national laboratory sa Central Visayas.
Ang mga nag positibong kaso gikan sa lungsod sa Minglanilla, samtang ang usa gisusi pa tungod kasamtangan kini nga na admit sa dakbayan sa Lapu-Lapu, matod ni Gobernador Gwendolyn Garcia atol sa press conference sa kapitolyo.
Duha ang nadugang sa lungsod sa Minglanilla nga gikan sa usa lang ka pamilya. Ang mga pasyente mao ang 57 anyos ug 33 anyos nga mga babaye ug anaa na admit sa Chong Hua Hospital.
Usa usab ang natala nga nag positibo gihapon sa repeat test gikan sa lungsod sa Cordova.
Gawas sa mga positibong kaso, natala usab ang unom ka mga indibidwal nga nakasinati ug severe acute respiratory illness (Sari), samtang 15 ang nakasinati ug influenza-like illness (ILI).
Sa kinatibuk-an, moabot na sa 147 ka mga kaso ang natala sa lalawigan sa Sugbo. (ANV)