Sugod sa Hunyo 1, ang tibuok Sugbo, apil ang Siyudad sa Sugbo, ubos na sa modified general community quarantine.
Gipahibawo ni Presidente Rodrigo Duterte ang pagpaluag sa mga restriction atol sa iyang pagpamulong sa nasod sa Huwebes sa gabii, Mayo 28, 2020 samtang nakigtagbo sa Cabinet members.
Si Mayor Edgardo Labella niingon nga uyon siya kon maoy mando sa nasudnong kagamhanan, apan sila si Mandaue City Mayor Jonas Cortes ug Lapu-Lapu City Mayor Junard Chan mapanagan-on kay alang kanila lugak ra kaayo ang MGCQ.
Gawas sa Metro Manila nga gipaubos na sa GCQ, laing unom ka mga dapit sa nasod ang ubos sa general community quarantine (GCQ) gikan sa Hunyo 1-15 naglakip sa: Davao City, Cagayan Valley (Region 2), Central Luzon (Region 3), Calabarzon (Region 4-A), ug mga lalawigan sa Albay ug Pangasinan.
Ang Mandaue City ug Cebu City ubos pa sa enhanced community quarantine (ECQ) hangtod sa Mayo 31. Ang Cebu City maoy ikaduhang epicenter sa coronavirus disease (Covid-19) infections sa nasod.
Ang MGCQ mas lugak nga bersyon sa GCQ, apan ang IATF wa pa makapagawas sa mga guideline niini. Matod sa IATF, ang MGCQ maoy hinayhinay nga pagbalhin gikan sa GCQ ngadto sa “new normal.”
Bisan gilugakan ang paglihok sa publiko, gipatuman gihapon ang physical distancing, pagsul-ob og maskaraug gidili gihapon ang mga panagtapok.
MODAWAT RA
Andam sundon sa Cebu City Government kon unsay hukom sa Inter-Agency Task Force for the Management on Emerging Infectious Diseases sa hangyo niining magpa GCQ.
Si Labella nihangyo sa IATF niadtong Mayo 28 sa buntag nga ipaubos sa GCQ ang Cebu City inay sa modified ECQ nga maoy hukom sa IATF niadtong Mayo 27.
Apan human sa pahibawo ni Duterte, si Labella niingon nga uyon siya bisan unsay hukom sa nasudnong kagamhanan, apan naghuwat pa siya sa tubag sa IATF sa iyang suwat.
“We have to follow... we will just act accordingly,” matod ni Labella.
MAPANAGAN-ON
Kon si Chan maoy pabut-on, ipabilin una sa status nga general community quarantine (GCQ) ang Lapu-Lapu, inay ang gihugon-hugon sa pag-downgrade niini ngadto sa modified general community quarantine (MGCQ).
Atol niining pagsuwat wa pay pormal nga komunikasyon nga nadawat si Chan gikan sa IATF nga nag-downgrade sa status sa Lapu-Lapu City.
“Para nako, angayan pang magpabilin ta sa GCQ sa pagkakaron. Akong reservation anang MGCQ ba kay naa pa man gud ang virus,” pamahayag ni Chan sa dihang nahinabi sa Superbalita Cebu.
Usa sa napanglantawan sa mayor nga sa higayon nga ipatuman ang MGCQ. tugotan na nga makagawas ang mga senior citizen nga gihulagway nga vulnerable nga mataptan sa Covid-19.
Mao usab si Cortes, mas pabor siya sa GCQ alang sa Mandaue City kay sa MGCQ. Sa unang rekomendasyon sa IATF-EID, miingon kini nga ipaubos sa GCQ ang dakbayan sa Mandaue.
Apan, sa speech ni Duterte, ang dakbayan apil sa mga dapit sa nasod nga ipaubos sa MGCQ.
Matod ni Cortes nga magpaabot nalang sila sa final nga rekomendasyon sa nasyonal nga kagamhanan.
Apan kung si Cortes lang ang padesisyonon mas uyon siya sa GCQ tungod kay ang MGCQ mas luag ang restrictions.
Alang kang Cortes nga sayo pa nga ipaluag ang mga restrictions tungod kay mas daghan og maapektuhan nga kinabuhi kon adunay second wave sa maong epidemya.
“We have to weigh things up. We have to balance health and wealth,” sigon ni Cortes.
Sa wa pa ang pag-anunsyo ni Duterte sa MGCQ, nangandam na ang dakbayan sa Mandaue og guidelines nga sundon sa mga tawo kon ipadayon ang GCQ.
Nangandam sad ang dakbayan ug 12 ka rota alang sa 120 ka mga bus nga mobiyahe sulod sa dakbayan sa Mandaue ug kasikbit nga mga dakbayan.
Nakigsulti sab si Cortes sa 27 ka mga barangay kapitan sa dakbayan aron hisgotan ang mga preparasyon sa dakbayan kon mapatuman ang GCQ karong Hunyo 1, 2020.
NEGUSYANTE
Samtang si Steven Yu, presidente sa Mandaue Chamber of Commerce and Industry (MCCI) niingon nga alangsa mas hapsay nga inanay ug luwas nga pagbukas sa ekonomiya, mas maayo ang GCQ nga level nga butangan sa Mandaue.
“With GCQ, most of the businesses will be re-opened. In terms of economic resuscitation, GCQ is the ideal next step,” siya niingon. / KFD, PAC, FQV, SunStar Phillipines