ANG Department of Health (DOH) niila sa walo ka mga barangay sa Dakbayan sa Sugbo nga angay pang ipailawom sa enhanced community quarantine (ECQ).
Sa usa ka press briefing sa DOH officials sa Mayo 29, 2020, ang Barangays Carreta, Sawang Calero, Bacayan, Mambaling, Labangon, Tejero, Luz, ug Suba giila nga red, nga nagkahulogan nga ang DOH nagrekomendar sa pagpadayon sa ECQ status.
Si DOH Central Visayas Regional Director Jaime Bernadas niingon nga mao kini ang mga dapit nga angay susihon kay mas taas sa 5 porsyento ang blood samples nga nakolekta sa mga nangapil sa mass rapid testing, dunay presensya sa antibodies.
Si Bernadas hinuon, niingon nga ang Cebu City Government kinahanglan nga magsugod sa iyang recovery surveillance sa maong mga dapit aron masuta kon pila na ka mga pasyente ang naulian sa coronavirus disease (Covid-19).
Duna usay 31 ka mga barangay diin ang DOH nakakitag panginahanglan kanila nga ipailawom sa modified ECQ kay duna silay labaw sa 25 ka mga kaso.
Kini naglakip sa Barangays Babag, Capitol Site, Kinasang-an, Sta. Cruz, Banilad, Camputhaw, Lahug, Sambag 1, Sambag 2, Talamban, Tisa, Busay, Day-as, Guadalupe, Pasil, Apas, Basak Pardo, Basak San Nicolas, Bulacao, Calamba, Cogon Ramos, Hipodromo, Inayawan, Kalunasan, Mabolo, Pardo, T. Padilla, Punta Princesa, Duljo, San Nicolas Central, ug Ermita.
Duna say mga barangay nga giilang green, mga dapit nga wa makakatap ang kagaw nga naglakip sa Barangays Buhisan, Pit-os, Pulangbato, Quiot Pardo, San Jose, Mabini, Sirao, Tinago, Budlaan, Cambinocot, Cogon Pardo, Kalubihan, Kasambagan, Lorega, Lusaran, Pahina San Nicolas, San Antonio, Sapangdaku, Zapatera, Toong, ug Pahina Central.
Si DOH 7 epidemiologist Junjie Zuasola niingon hinuon nga bisan tuod kon ang mao nga mga barangay way aktibong kaso sa Covid-19, ang blood samples nga nakuha sa mga lumolupyo ning mga dapita dunay presensya sa IgM kun aktibong infection.
“However, because of the study that we have performed, we took samples from their residents. We found that even if they don’t have (Covid-19 cases), there are some residents that have IgM (active infection). They don’t have symptoms but they were exposed (to the virus). They had active exposure. Probably, they had infection,” pagpasabot ni Zuasola. “And at the same time, there are also some residents that already been exposed (to the virus) because they have IgG (past infection),” matod niya.
Si Cebu City Mayor Edgardo Labella, sa iyang bahin, mokonsiderar sa nakaplagan sa health officials.
Matod ni Labella nga tipik na sa iyang plano ang pagpatuman og lockdown sa kritikal nga mga dapit. (JJL)