GITUGOTAN na nga makagawas sa dakbayan sa Lapu-Lapu ug makapauli sa ilang tagsatagsa ka mga dapit sa lalawigan ang mga indibiduwal nga natanggong sa dakbayan dihang naabtan og lockdown sa Covid-19.
Gipahibalo ni Mayor Junard Chan nga gisugdan ning semanahona ang pag-proseso sa na-stranded sa dakbayan hinungdan nga ubay-ubay nga tawo ang miduaw sa barangay hall ug city hall, taliwala sa gipatuman nga general community quarantine (GCQ) sa siyudad.
Ang maong mga indibiduwal naglukat sa mga gikihanglan nga dokumento nga magsilbing passes aron nga makatabok sa laing siyudad ug munisipalidad, atol sa ilang paggawas sa Lapu-Lapu ngadto na sa ilang tagsa-tagsa ka mga destinasyon.
“Kining locally stranded nga gi-process nato mostly province nga lagyo like Balamban, Bantayan ug kadtong tua pud didto nga gusto nang mo-uli dire sa Lapu-Lapu,” matod ni Chan.
Matod sa mayor nga makalabang ang maong mga indibiduwal sa silingan nga local government unit (LGU) dala ang mga dokumento sama sa medical certificate gikan sa city health office ug authority to travel gikan sa buhatan sa mayor nga maoy gipatuman nga protocol.
Ang medical certificate magpamatuod nga negatibo na sa coronavirus disease 2019 (Covid-19).
Mitambag si Chan sa mga stranded ug mga Oponganon nga tua sa laing dapit nga buot nang mopauli nga mopadangat sa ilang concerns o pagpangayo og assistance pinaagi sa email: si@lapulapucity.gov.ph. (FVQ)