UPAT ka mga mini bus ang gihangyo sa kagamhanan sa Dakbayan sa Naga sa Land Transportation Franchising and Regulatory Board (LTFRB) aron maoy moserbisyo isip pampublikong transportasyon sa dakbayan. Duha ka mga mini bus ang mobiyahe nga may rota nga Naga-Uling ug adto manukad sa Metro Naga.
Minimum nga pletihan P30.
Aduna usay nga mobiyahe nga may rota Naga-Langtad kon asa nahimutang ang Bagsakan Center.
Ang rota sa Inayagan-Naga anha manukad sa atubangan sa simbahan sa kinapusoran sa siyudad ug P20 ang minimum sa plitehan.
Ang mga mini bus mobyahi sugod sa alas 6 sa buntag hangtod na sa alas 6 sa gabii.
Adto kini mohunong sa gitagana nga bus stops sa matag barangay.
Sa kinatibuk-an, aduna nay 190 ka mga bus ug mini bus ang giandam ug hinayhinay nga gipabyahe sa kadalanan sa lalawigan sa Sugbo. Kini ang gipahibawo ni Gobernador Gwendolyn Garcia atol sa press conference sa Kapitolyo.
Moabot 93 ka mga bus ang mobyahe sa amihanan nga bahin sa Sugbo nga manukad sa lungsod sa Consolacion.
Samtang 92 usab sa habagatan nga bahin sa Sugbo nga manukad usab sa Lantaw, Talisay.
Alang sa mga mobiyahe sa kasadpan, may lima usab ka mga bus ug mini bus ang nagbiyahe.
Sa wa pa sila nagsugod og biyahe, gipahimangnoan sa kagamhanan ang mga drayber ug konduktor sa estriktong pagpatuman sa physical distancing sa ilang units.
Samtang kadto lang adunay home quarantine pass (HQP), company-Issued identification (ID) card ug certificate of employment ug kinahanglan nagsul-ob og maskara ang makasakay. (ANV)