KAPIN na sa tulo ka buwan nga gipatuman ang quarantine. Tanan nangaapektuhan. Way wala maigo sa restrictions nga gipatuman sa kagamhanan. Tanan miping-it. Naa gani mga negusyo nga wa na makabangon, nanira na lang og diretso. Apan ang labing apektado kaayo mao ang kabus, yano nga mga mamumuo ug mga driver sa pampublikong mga sakyanan, sama sa PUJ ug taxi.
Ang PUJ ug taxi drivers nagsalig sa ilang inadlaw nga kita. Kon di makapamasahero, way kita, way makaon ang ilang mga pamilya. Sa dul-an sa upat ka mga buwan nga wa makapamasahero, seguradong nagkagidlay ang ilang mga pamilya. Tagsa ra kanila ang dunay savings alang sa lisod nga panahon, sama ning pandemic karon.
Tingali, mao ni ang rason nga si Lapu-Lapu City Mayor Junard “Ahong” Chan wa kaayo mobadlong sa mga pasaheroang multicab nga nanagan sa siyudad dihang gisugdan na sila sa pagpailawom sa general community quarantine.
Nag-ilad na ang mga pamilya sa mga drayber unya wa nay mahatag ang kagamhanan kay mabaw na kaayo ang bulsa, wa nay ikatunol hapit nga hinabang. Ang kagamhanan mismo nagdugo.
Ning anam nga pagbalik karon sa kinabuhi sa katawhan, maayo usab nga hatagan og kahigayunan ang taxi ug PUJ drivers nga makapamasahero, apan limitado ang mapasakay. Sundon ang tanang health protocol, sama sa pugsanay nga pagsul-ob og face mask ug pagdala og alcohol kanunay.
Ang mga awtoridad usab kinahanglan nga magbantay, di lang sa mga drayber, apil na mga pasahero nga molapas sa social distancing ug uban pang protocol. Kinahanglan nga higpitan ang pag-limit sa mga pasahero sa matag sakyanan. Kon unsay naa sa balaud, mao ni ang ipatuman. Makaya kini sa kagamhanan pagpatuman kay nahimo gani ang paghigpit sa pagsugod sa quarantine.
Kinahanglan usab mosabot ang mga pasahero nga mas mahal na karon ang pletihan kay limitado ang makasakay.