2 ka bata nakuryintehan, 1 patay

KORAL MAY KURYINTE: Kini ang koral sa balay ni Kong. Paz Padaza sa isla sa Olango, dakbayan sa Lapu-Lapu diin dunay buhing wire sa kuryinte nga nipakirig sa duha ka mga bata, apan usa niini ang namatay, niadtong Biyernes sa hapon, Mayo 29. (Gikan sa Lapu-Lapu City Police Office)
KORAL MAY KURYINTE: Kini ang koral sa balay ni Kong. Paz Padaza sa isla sa Olango, dakbayan sa Lapu-Lapu diin dunay buhing wire sa kuryinte nga nipakirig sa duha ka mga bata, apan usa niini ang namatay, niadtong Biyernes sa hapon, Mayo 29. (Gikan sa Lapu-Lapu City Police Office)

PATAY ang usa sa duha ka mga bata nga nakuryintehan sa live wire diha sa ibabaw sa koral sa balay ni Kongresista Paz Radaza sa Sitio Proper, Barangay Tungasan sa isla sa Olango, dakbayan sa Lapu-Lapu niadtong Biyernes, Mayo 29, alas 5:00 sa hapon.

Ang namatay mao si Renren Taneo, 11, nagpuyo sa nahisgutang lugar ug wa na matabang sa mga doktor sa Sta. Rosa Community Hospital.

Ang nalinggawas nga bata mao si Elgie Apa, 8.

Si Police Captain Genesis Aniversario, hepe sa Olango Police Station nga nahinabi sa Superbalita Cebu, nagkanayon nga ang biktima uban sa saksi nga 8 anyos misaka sa perimeter fence sa balay ni Radaza, kanhi mayor ug karon repsentante sa bugtong congressional district sa Lapu-Lapu.

Matud ni Aniversario, ang maguwang sa biktima nga si Rizy Taneo maoy nipahibalo kanila nga alas 5:00 sa hapon sa samang adlaw, ang iyang manghud nakurentihan.

Sa imbestigasyon sa kapulisan nasuta nga ang bata kuyog sa iyang apuhan nga si Maria nga nanguha og mga sagbot nga naper alang sa ilang binuhing hayop dapit sa Tungasan Elementary School, dihang kalit nga nahanaw ang iyang apo.

Wa mabantaye sa apuhan kon asa kini mipadulong, apan pipila ka minutos usa ka singgit sa bata nga naghilak nangayo panabang nasuta nga ang 8 anyos nga si Elgie Apa.Mitug-an nga si Renren, nipilit sa koral ang iyang maguwang samtang manguha unta sila og mangga sa dapit.

Gisaysay niini nga sa pagkupot niya sa perimeter fence nga dunay barbwire, nanguryinte kini hinungdan nga siya miatras. Apan ang gikatahong nidiretso sa pagkupot ug katkat sa perimeter fence ang maguwang hinungdan nga mikirig.

Ang apuhan uban sa mga silingan og sa caretaker nga si Rizy Inoc, ang nagdali sa pagsulod sa compound gitabangan nila ang bata. Si Inoc nibutyag nga wa gyud siya magbutang og live wire sa maong lugar. Nagtuo siya nga basin napanit ang linya sa kuryenti nga gikitkit sa ilaga ug sa ubang hayop.

Si Captain Aniversario niingon nga ilang palawman ang imbestigasyon ug ilang nakita nga dunay wire gikan sa tent duol sa perimeter fence maoy nakaingon nga nakuryintehan ang bata.

"Dako gyud og paso sa iyang bukobuko ang Bata, unya nasamad sab iyang mga tiil kay natagak man nasangit sa barbwire," dugang ni Aniversario.

Sumala ni Aniversario nga makatulo na kahigayon nga nakarespondi ang ilang mga sakop kabahin sa mga bata nga mosaka sa koral kay manguhag mangga apan inig abot nila, managan.

Gipadayag niini nga disgrasya gyud ang maong panghitabo. Ang kabanay sa biktima Nibutyag nga mitawag na kanila si Radaza ug nipasalig nga tabangan sila sa pagpahiluna sa namatay. (GPL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph