PATAY ang bana ug anak human nga gitigbas-tigbas sa kaugalingong asawa samtang samdan usab ang tulo ka mga apo mga alas 6:00 sa buntag niadtong Biyernes, Mayo 29, 2020 sa Sitio Magpait, Barangay Cabalantian, Manticao, Misamis Oriental.
Ang suspetsado naila nga si Vivina Loresca, 70 anyos, ang kasamtangang anaa sa kustodiya sa kapulisan sa Manticao kinsa giingong nitukar pagbalik ang sakit sa pangisip gumikan sa pagkamatay sa iyang anak tungod sa balatian ug nahimo ang nahisgutang ngilngig nga krimen.
Wala na'y kinabuhi nga naabtan sa mga otoridad ang mga biktima nga sila si Luciano Loresca, 70 anyos, ug ang anak nga si Elvie, 40 anyos, kinsa giingong gigulgol ang mga li-og ug grabe nga samad nga nahi-agoman sa tiyan nga bahin.
Samtang samaran usab ang mga apo nga 13 anyos, 10 anyos ug 8 anyos kinsa pulos mga babaye nga gisulayan usab sa pagtigbas apan giingong nakadagan palayo ug anaa sa luwas nga kahimtang.
Sa impormasiyon nga nahipos gibutyag sa kapulisan nga nangatulog ang mga biktima gumikan na usab kay hago kini sa dihang nag-vigil sa kamatayon sa ila ra usab nga membro sa pamilya.
Samtang tulog ang mga biktima kalit lang matud kining gipanigbas ug swerteng nakamata ang usa sa mga bata ug gipamukaw ang iyang mga igsoon.
Gidugang pa nga wala matud niangkon ang suspek sa iyang nahimo apan ang mga bata mismo ang nakasaksi sa maong insidente ug gitumbok ang apohan.
Narekober usab ang giingong mahait nga hinagiban nga gigamit sa maong pagpanigbas.
Ang suspetsado ang kasamtangang anaa na sa bilanggoan kinsa posibleng mag-atubang sa kaso nga parricide.
"Related ra gyud sila by blood so parricide gyud ang mabutang nato ni nga kaso," matud ni Police Lieutenant Chance Ramirez, hepe sa Manticao Municipal Police Station.