Ika-13 Covid-19 patient sa CdeO unang nag-negatibo sa RT-PCR test

GIKUMPIRMA sa Northern Mindanao Medical Center (NMMC) nga duna’y laing usa nga nadugang sa Cagayan de Oro nga positibo sa coronavirus disease 2019 (Covid-19) kinsa unang nagnegatibo sa RT-PCR Test sa dakbayan sa Cebu.

Ang ika-13 nga kumpirmadong kaso mao ang 49 anyos nga babaye nga taga Barangay Kauswagan ning siyudad kinsa gikan sa Cebu City ug nakaabot sa siyudad niadtong Mayo 25, 2020.

Gibutyag ni Dr. Bernard Julius Rocha, medical specialist II sa NMMC, nga ang maong pasyente unang nagnegatibo sa RT-PCR test sa Cebu niadtong Mayo 16, 2020.

“Ang history sa patient was this patient actually came from Cebu so 15 days prior to this admission, this patient had a routine test which was RT-PCR test sa Cebu in preparation para sa iyang travel to balik sa Cagayan,” matud ni Rocha.

Apan niadtong Mayo 21 gikabutyag nga duna kini nakauban og panihapon nga giingong asymptomatic nga mga Covid-19 positive diin posibleng nakuha ang maong novel coronavirus.

“May 16 nigawas gyud ang iyang resulta which tested negative however on May 21 based on history taken from the patient, the patient attended a dinner in which allegedly there were four asymptomatic Covid-19 individuals during that dinner in which the patient had interact with,” dugang pa.

Gipasabot usab ni Rocha nga ang virus duna’y incubation period nga mga tulo ngadto sa katorse ka mga adlaw rason nga mas maayo nga indibdiwal nga nagbaton niini nga virus ma-test ilabi na kung duna nay sintomas kay dako ang kasigurohan nga ang resulta niini mamahimong positibo.

Sa pagbalik niini sa dakbayan sa Cagayan de Oro sa City Isolation Unit (CIU) nakasinati na kini og pag-ubo, pagpangatol sa tutonlan rason nga gidala kini sa NMMC niadtong Mayo 28 tungod kay padayon pa ang hilanat nga anaa sa 38.4 rason na usab nga gi-test pagbalik ang maong pasyente diin nigawas usab ang resulta nga nagpositibo sa maong virus.

Ang maong pasyente duna nay mga comorbidities sama sa hypertension ug diabetes kinsa giingong anaa sa stable nga kahimtang sa pagsulat niini nga balita.

Padayon pa usab ang contact tracing nga gihimo sa City Health Office (CHO) kalabot na niini nga bag-ong kaso sa dakbayan.