PATAY ang usa ka barangay kagawad human gipusil sa wala mailang mga suspetsado sa Barangay Sinaysayan, Kitaotao, Bukidnon.
Ang biktima nailang si Rene Boy Jagunos, 52, minyo ug usa ka kagawad kinsa residente sa Sitio Gumada, Brgy. West Dalurong, Kitaotao, Bukidnon.
Sa imbestigasiyon gikabutyag nga sakay sa motorsiklo ang biktima paingon sa barangay hall sa Barangay West Dalurong aron pag-duty apan kalit nga giatangan sa wala mailang tulo ka mga suspek ug gipusil sa makadaghang higayon.
Dali usab nga nisibat ang maong mga suspek agi sa suba nga bahin sa maong dapit.
Nakaangkon og ubay-ubay ka mga samad sa lawas sa nagkadaiyang parte sa lawas ang biktima hinungdan sa hinanali niini nga kamatayon. Ang patay nga lawas ang gidala sa Villanueva Funeral Homes alang sa eksaminasyon.
Padayon ang operasiyon ug follow up investigation sa kapulisan aron sa pagsikop sa mga suspek.