MALINAWON ug hapsay ang kinatibuk-ang Barangay Baliok, sa Talomo District Davao City gumikan sa kooperasyon sa mga residente ug sensiro nga panerbisyo sa kasamtangang mga opisyal sa barangay.
Sa pakighinabi sa Superbalita Davao kang Barangay Baliok Kapitan Ricky Liparanon, iyang gibutyag nga makanunayon ang ilang gihimong pagpahimangno sa katawhan sa mga angay nga buhaton aron mapabiling anaa sila sa luwas nga kahimtang taliwala niining coronavirus disease 2019 (Covid-19).
“Matag-karon ug unya atoa silang gipahimangnoan nga stay at home, katong mga bag-ong abot gikan sa mga laing lugar, subject to PUM [persons under monitoring] to sila monitored by our BHERT (Barangay Health Emergency Response Team). Naa koy mga disaster sa atong barangay nga naga-disinfect by purok. Kini maoy pamaagi nga malikayan ang kaso sa Covid-19 sa atong barangay,” ingon ni Kapitan.
Aron malikayan ang pagsige og gawas sa mga residente, mas giistrikto pa sa mga taga barangay ang pagkuti-kuti sa mga pangutana sa ilang paggawas ug ang istriktong pagpatuman sa curfew hours.
“Padayon gihapon kami nga naga-roving, naa may naka-violate sa curfew hours gi-endorse namo kini sa Talomo Police Station. Dili kayo problema and peace and order, kung naay mga tawag nga mga emergency ma-respondehan dayun sa mga tanod. Ug tanang mga basketball court gibutangan namu’g ali aron dili magamit ug malikayan ang pagtapok-tapok. Ang mga ginikanan sa mga bata, ginapahimangnuan gyud namo nga dili mag gawas-gawas ug syempre ang FM pass istriktong pagpatuman sa coding niini. Labi na nang mga sugal ug inom, istriktong gi-implementa ang liquor ban,” butyag sa kapitan.
Aron nga mas mahatagan pa sa panginahanglanon sa mga molupyo sa dul-an 6,000 ka mga panimalay nga dunay mokabat kapin kun kulang 18,000 ka mga residente, gibubo na sa barangay alang sa ayuda ang ilang Barangay Development Fund (BDF) ug ang calamity fund niini uban sa ayuda sa mga opisyal sa dakbayan.
“Daghan salamat sa atong pinalanggang Mayor Inday Sara Duterte-Carpio nga nagahatag og suporta sa atong barangay, sama sa mga food packs ug sukad pag enhanced community quarantine (ECQ) every day nagapalugaw. Kay First District Congressman Paolo ‘’Pulong’’ Duterte nga gihatag sa among barangay na mga food packs. Sa initiative sa mga barangay council. Ang BDF (Calamity Fund 2016-2020), amo kining gigamit pangpalit og bugas para tanan among matagaan ug walay magmahay. Ug syempre kay Senator Bong Go nga nagahatag pud og foodpacks. Salamat pud sa 19th City Council nga naga-suporta kanunay sa among barangay especially to Councilor Quitain,” dugang sa kapitan.
Niya pa sa dugang pagpasamat, “Magpasalamat pod kami kang Vice Mayor Sebastian Duterte, Congressman Jerico Coco Nograles, sa atong mga city councilors, BF Industries, UCEEM, Mr. Tracker Lim. Kining tanan dili mahimo kung dili tungod sa mga kauban natong mga frontliners.”
“Sa mga residente sa atong barangay dili nato kalimtan ang basic nga mga procedure kay kining simple nga procedure dakong tabang nga makasalbar og kinabuhi sama sa paghugas sa atong mga kamot gamit ang sabon ug tubig, ang paggamit og alcohol, pagsuot og face mask ug pagpatuman sa social distancing,” panapos ni Kapitan Liparanon.