COTABATO CITY - Midugang og P30,000 si Davao City Mayor Sara Duterte-Carpio sa makasikop sa nagpatay sa executive secretary ni Cotabato City Mayor Attorney Cynthia Guiani-Sayadi.
Una na nga nagpagawas og P300,000 si Mayor Guiani-Sayadi sa mga tawo nga makatudlo sa mipusil-patay sa iyang secretary nga si Anecito ”Boy” Rasalan.
Sumala kang Sayadi dakong tabang na ang P30,000 nga gidugang ni Mayor Duterte-Carpio sa ganti nga gitanyag niini batok sa mga suspetsado.
Moabot na sa P550,000 ang ganti gumikan dunay mga negosyante ug mga inilang tawo ang nagdugang niini.
Kahinumdoman nga nagkaon sulod sa Sehua Eatery ang biktima dayon gipusil sa usa ka tawo sa makadaghang higayon gamit ang kalibre .45 nga pistola.
Abtik sab nga miikyas ang namusil nga misakay og motor sa kauban ang laing usa pa nga naghulat daplin sa kalsada.
Nadala pa si Rasalan sa mga nagresponde nga pulis sa Cotabato Regional and Medical Center (CRMC) apan gideklara kini sa mga doktor nga dead on arrival.
Nakaangkon og samad pinusilan ang biktima sa iyang ulo, apapangig, dughan ug bukton nga maoy hinungdan sa kamatayon niini.
Sa kasamtangan dunay mga tawo na nga gi-imbestigahan ang Cotabato City Police Station nga gipangulohan ni Colonel Richard Fiesta nga posibleng dunay kalabutan sa pagpatay kang Rasalan.