3 ka piniriso gi-Covid; San Fernando jail gi-lockdown

San Fernando, Cebu. (Google Maps)
San Fernando, Cebu. (Google Maps)

Gipaubos ni San Fernando Mayor Neneth Reluya sa lockdown ang detention cell sa San Fernando Police Station sa Dominggo, Mayo 31, 2020.

Kini human magpositibo sa coronavirus disease (Covid-19) ang tulo ka mga binilangggo.

Giluwatan ni Reluya ang Executive Order (EO) 18 alang sa pag-lockdown sa pasilidad base sa iyang Facebook page post.

Gikompirmar usab kini ni Patrolwoman Haide Abuyabor sa San Fernando police dihang gihinabi sa Superbalita Cebu.

Matod ni Reluya nga iyang gi-isolate ang mga detainee sa laing pasilidad sanglit may gibati na kining simtomas sa wa pa mogawas ang resulta.

Hinuon gipahigayon gihapon ang contact tracing sa kagamhanan alang sa mga naka hugoyhugoy sa mga piniriso.

Si Abuyabor niingon nga gisusi pa kon nganong nataptan sa Covid-19 ang tulo nga unta wan a man silay gidawat nga bisita sukad sa quarantine.

“Amo pa nang gisusi kay sukad nag GCQ (general community quarantine), enhanced community quarantine (ECQ) ta, wa na man gyud ta manawat diri og mga dalaw,” butyag ni Abuyabor.

Matod niya nga human mabalhin sa laing pasilidad ang tulo, way bisan usa sa mga binilanggo nga nangahabilin ang nagpakita og mga simtomas sa Covid-19.

Ang tulo nga gi-isolate ug maayo na usab og panglawas.

Ang pasilidad layo ra sa kabalayan sa lungsod busa di angay nga mabalaka ang mga lungsoranon, dugang ni Abuyabor.

Wa na siya mosulti pa kon nganong nabantayan nga dunay simtomas sa Covid-19 ang tulo ug kanus-a sila na-isolate ug nakompirmar nga sila nataptan sa sakit.

Sa kinatibuk-an, ang lungsod nakatala na og lima ka mga positibong kaso sa Covid-19. (ANV/REV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph