GITATAW sa Philippine Basketball Association (PBA) nga taliwala sa dakong problema nga hatod sa coronavirus disease 2019 (Covid-19), lig-on lang gihapon ang pundasyon sa liga.
Gani, gibutyag ni Commissioner Willie Marcial nga andam makigtambayayong ang PBA sa gobiyerno sa padayong pagpakigbatok niini sa Covid-19.
"Sa hirap nang pinagdadaanan ng lahat ay nakakaraos pa rin naman po ang PBA. At ipinararating po ng aming chairman, Mr. Ricky Vargas, na kung may i-o-offer kayong tulong ay itulong na lang po natin sa mas nangangailangan," matod ni Marcial sa hearing sa Senate committee on finance nga napatik sa www.pba.ph.
Ning panahon sa krisis sa kahimsog diin apektado ang tanan, si Senator Sonny Angara nagpatawag og senate hearing aron sutaon kon unsa ang angayan buhaton sa gobiyerno aron makatabang sa pribadong sektor diin usa na niini ang PBA.
Gustong masayran ni Angara ang yangungo sa pribadong sektor aron makahimo og lakang ang gobiyerno alang sa paghatag og ayuda.
"Moving forward, we will determine what must be done to help them minimize their losses and preserve the jobs of their employees now that they will have to operate under a drastically different environment that we are calling the new normal," asoy pa ni Angara.
Dili ikalimod nga ang mga negosyo sa tag-iya og teams sa PBA pulos naapektuhan sa Covid-19.
Apan gipasalig sa tag-iya og teams sa PBA nga padayon silang motabang sa gobiyerno sa pagsagubang ning dakong problema. (ESL)