NAANGKON sa Filipino US-based Grandmaster Wesley So ang titulo sa labing unang edisyon sa Clutch Chess Champions Showdown niadtong Abril 30, 2020 (RP time).
Ning maong kalampusan, si So nakabulsa og 40,000 o P2.01 million. Basi sa US Chess Champs website, si So nakapundo og 9.9 puntos human sa torneyo diin nagtabla sila ni world No.2 GM Fabiano Caruana.
Apan nasakmit ni So ang kampiyunato human sa tie-break.
“Today was up and down but I am so relieved on the final outcome, as in a two-game blitz match anything can happen. I’ve had the opportunity to play some of the strongest players, Hikaru Nakamura and Fabiano Caruana, in this new tournament,” matod ni So.
Si So, kinsa lumad nga taga Cavite, naggukod og usa ka puntos kang Nakamura sa premirong adlaw sa semi-finals.
Nibawi si So sa ikaduhang adlaw diin nadaog niya ang katapusan niyang tulo ka mga duwa sa 9-round event aron pag-abante sa finals.
Sa finals, midaog si So sa premirong duwa apan mibawos si Caruana sa ikaduha.
Ang Clutch Chess usa ka bag-ong online chess tournament. (ESL)