USA ka 3-anyos nga batang lalake nalumos human gituohang nadakin-as ug nahug sa lim-aw sa busay sa Malabago, Barangay Manga, lungsod sa Alcantara, Sugbo, alas 10:30 sa buntag sa Sabado, Mayo 30, 2020.
Ang biktima mao si Prince Kenneth Tanduyan, 3, patay nang nakit-ang nilutaw sa iyang inahan nga si Grace.
Si Police Chief Master Sergeant Jeremias Elardo sa Alcantara Police Station nga nahinabi sa Superbalita Cebu, nagkanayon nga usa ka concerned citizen maoy nipahibawo kanila sa insidente alas 5:15 na sa hapon.
Matod ni Elardo, si Grace nanglaba sayo sa buntag ingon man naligo kuyog ang iyang duha ka mga anak, ang 3 anyos ug maguwang nga si Princess, 6.
Ang iyang bana didto sa ilang umahan nagtikad.
Si Grace nibutyag sa kapulisan nga ang duha ka mga bata ning-una sa pagpauli sa ilang balay mga 80 metros gikan sa Malabago Spring.
Siya nipauli paghuman niya og panglaba mga alas 10:30 sa buntag.
Apan sa iyang pag-abot, si Princess, kinsa amang, ang diha sa balay.
Iyang gipangita si Prince Kenneth, apan wa kini motubag sa iyang pagsangpit.
Sa iyang pagbalik sa spring, iyang nakaplagan si Prince Kenneth nga naglutaw sa tubig, patay na.
Nagtuo sila si Elardo nga nadakin-as ang bata samtang nagbaybay sa daplin sa spring. (GPL)