BOLUNTARYO sa enhanced community quarantine (ECQ) checkpoint sa Fairview Subdivision, Barangay Basak Pardo, dakbayan sa Sugbo ang angol human naigo sa bala gikan sa armas sa usa ka gwardiya nga giingong aksidente nibuto niadtong Sabado sa gabii, Mayo 30.
Si PCpl. Isidro Rosaldo sa Labangon Police Station, niila sa biktima nga si Richmoon Agudo, 23, ug molupyo sa Sityo Cana-an sa naasoy nga barangay.
Ang suspek mao si Julan Caracut, 34, molupyo sa dalan Sabellano, Barangay Quiot ug guwardiya sa Aznar Compound sa dan Sabellano sa maong dapit.
Sa imbestigasyon sa kapulisan nga ang boluntaryo nga si Agudo gisugo og ilimon sa mga construction worker sulod sa Aznar compound. Apan sa pagbalik na sa boluntaryo dala ang usa ka kahon sa beer, tayming nga nakablitan sa guwardiya ang iyang armas ug naigo kini.
Si Agudo gitabangan sa kaubanang mga volunteer ug gipalingkod sa lingkuranan samtang nagpaabot sa ambulansiya aron madala sa balay tambalanan.
Matod sa gwardiya, wala matuyo ang pagkapusil kang Agudo human nakablitan niini ang trigger sa iyang armas, apan ang mga kaubang volunteer niinsister nga gipusil sa gwardiya ang biktima.
Si Caracut anaa na na karon sa Labangon Police Station gipriso ug mag-atubang og kasong reckles imprudence resulting to physical injury.
GIDUNGGAB
Sa laing bahin, patay ang lalake nga namiyesta sa Barangay Looc Norte, lungsod sa Asturias niadtong Sabado sa hapon, Mayo 30, human gidunggab sa laing mamistahay usab.
Si PSSgt. Bendie Nuñez sa Asturias Police Station miila sa biktima nga si Leonedes Tugbong, 47, taga Purok 4 ug walay trabaho, taga Looc Norte sa naasoy nga lungsod.
Samtang, ang suspek giila ni Nuñez nga si Joel Tubong, hingkod, ug molupyo sa Purok sa 3 sa susamang barangay.
Nahitabo ang pagpanunggab pasado alas 5 sa hapon niadtong Sabado sa Barangay Looc Norte, kinsa nagsaulog sa kapiyestahan sa patron nga Santa Cruz.
Matod ni Nuñez, ang biktima ug suspek pulos na nakainom nga namiyesta sa balay ni Angelito Tautjo, barangay tanod sa maong barangay.
Si Tubong maoy una na sa sulod sa balay sa barangay tanod nga nag-inom ug nikalit og sulod si Tugbong.
Sumala sa kapulisan, si Tugbong nisulod sa balay ni Tautjo aron mamista apan gikasuko sa suspek hinundan sa ilang panaglalis.
Si Tubong nisulod sa kusina ug nikuha og kutsilyo dayon balik ug walay igong estorya gidunggab si Tugbong, kinsa nakaangkon og samad dinunggaban sa iyang tiyan ug likod.
Gidala kini sa tambalanan apan gideklarar nga dead-on-arrival.
Ang suspek dali ra usab nadakpan sa Asturias Police Station sa ilang pagresponde ug karon nag-atubang og kasong homicide. (BBT)