GITUGOTAN na sa pag-abli ang mga pinili nga establisemento, buhatan sa gobyerno ug makadagan na ang tanang matang sa public transportation lakip na ang mga barko sugod karon, Hunyo 1 hangtod Hunyo 15.
Kini human nilagda og Executive Order Number 79 si Mayor Edgardo Labella pagpaubos sa Cebu City sa general community quarantine (GCQ) pinasubay sa resolution number 41 sa Inter-Agency Task Force on the Management of Emerging Infectious Disease (IATF-MEID).
Ilawom sa EO-79 ni Labella, ang mga bus, public utility jeepneys (PUJ) apil ang modern jeepneys, ug vans for hire kinahanglan nga mosunod sa guidelines sa Land Transportation Franchising and Regulatory Board diin ang ilang pasahero dili molapas sa 50% capacity.
Ang mga taxi ug Transport Network Vehicle Service (TNVS) kinahanglan nga tulo ra ang ilang labing daghan nga pasahero aron maobserbar ang social distancing ug exempted sila sa number coding.
Gitugotan sab ang private transportation sama sa company shuttles, personal vehicles, bicycles, motorcyles, ug e-scooters apan kinahanglan silang mosunod sa number coding.
Makalawig na usab ang mga barko subay sa lagda sa IATF ug Maritime Industry Authority diin ipatuman gihapon ang 50% capacity sa mga pasahero.
"All shipping companies, ship operators, ship chaterers and all concerned may operate and travel to and from areas under GCQ. In no case shall travel any port under ECQ be allowed," matod sa EO ni Labella.
Ang mga business establishment nga moabli sugod karon kinahanglan nga moduso sa ilang employee information, statement of management responsibility for maintaining workplace health standards ug workplace health contingency plan.
Ang mga business eatablishment nga wala gitugotan sa pag-abli mao ang hotels o susamang establisemento gawas lang kon adunay advance nga booking sugod Mayo 1 ug kadtong nag-atiman sa mga niuli nga OFW ug uban pa.
Padayon nga sirado ang fitness centers, sports facility, kid amusement industries, libraries, archive, museums, cultural centers, internet cafe, tourist destinations, travel agencies, tour operators ug personal care services sama sa salon, barber shop, facial care ug susamang establishments.
Ang mga balay patigayon nga giila nga essential sa nangaging mga EO magpabilin nga abli ug 100% sa ilang mga kawani mahimong makatrabaho.
Apan 50% ngadto sa 100% nga manpower alang sa beverage (alcoholic) electrical machinery, wood products, furniture, non-metalic products, textiles, apparels, tobacco products, paper and paper products, rubber and plastic products, coke and refined products, other none metalic mineral products, computer, electrical, optical products, electrical equipment, machinery and equipment, motor vehicles, trailers and semi trailers ug uban transport equipment.
Apil sab ang cement ug steel, mining and quarrying, electronic commerce companies, postal, courier and delivery services, export oriented companies, real state activities, repair of computers, housing services, special purpose accomodation, BPO, banks, money transfers, pawnshops, veterinary clinic ug daghan pang uban.
Ang adunay estrikto nga 50% nga manpower mao ang advertising and market research, publishing and printing services, film, music, TV production, legal and accounting, malls, commercial centers sama sa restaurant apan pulos ra take-out ug daghan pang uban. (PAC)