GIKAN sa 212 ka units nga gitino sa Land Transportation Franchising and Regulatory Board (LTFRB) 7 nga managan sa mga dakbayan sa Sugbo, Mandaue, Lapu-Lapu, ug Talisay, gipanglantawan nga 70 pa lang kini ka units apan dili tanan magdagan sugod karon, Lunes, Hunyo 1.
Matod ni LTFRB 7 regional director Eduardo Montealto Jr., sa Hunyo 3 pa hingpit nga madagan kining 70 ka units diin 60 niini ang bus ug 10 niini ang modern jeepney.
Gawas sa special permit gikan sa ilahang buhatan, gikinahanglan usab ang Provincial Public Utility Pass (PPUP) kon ang maong rota moagi sa local government unit (LGU) nga ubos sa probinsiya sa Sugbo.
Usa sa tan-awon sa LTFRB 7 ang demand sa mga pampubliko nga sakyanan alang sa mga pasahero hilabi na kadtong mga trabahante nga mamalik na sa ilang trabaho.
Gibutyag hinuon ni Montealto nga kasagaran sa mga kompaniya, nikuha og ilahang kaugalingon nga shuttle aron mokuha ug mohatod sa ilahang kawani.
Lakip sa rota nga ilahang giandam kining South Bus Terminal paingon sa Mactan Cebu International Airport ug pabalik.
Giandam usab nila ang Opra-Carbon; Busay-Carbon; Guadalupe-Ayala, SM; Cebu City Hall-Cebu Business Park; R. Duterte St.-Cebu Business Park; F. Llamas, Labangon-SM City Cebu via SRP; SM Seaside-I.T. Park.
N. Bacalso (CITI Hardware)-Capitol via Osmeña Blvd.; N. Bacalso (CITI Hardware)-Capitol via V. Rama Ave.; IL Corso-I.T. Park; SM Seaside-Talisay City via N. Bacalso; Talamban-V.Rama Ave.; H. Abellana St. (Tintay Market)-Colon St.; Talamban Road (Talamban Gym)-Cebu City Hall.
Cebu South Bus Terminal-Lapu-Lapu City Terminal via Imus, NRA; ug Katipunan St., (Tisa Barangay Hall)-Mabolo (F. Cabahug St.).
Kon basehan ang maong 'Identified Routes Under GCQ' sa LTFRB 7, aduna'y pipila niini nga existing na, samtang ang uban gipuno lang tungod kay dili paman mamahimo nga makadagan ang traditional nga jeepneys.
Anaa gihapon sa 50% nga kapasidad ra ang pwede nga makasakay sa maong mga pampubliko nga sakyanan gikan sa orihinal nga kapasidad niini.
Anaa sa P11 ang pletihan sa unang lima ka kilometros ug P1.85 ang matag mosunod nga kilometro sa non-aircon nga bus, P13 sa first five kilometers ug P2.20 sa matag mosunod nga kilometro sa aircon bus.
Samtang sa modern jeep, anaa sa P11 ang parehong aircon ug non-aircon sa unang upat ka kilometro apan P1.50 ang succeeding sa non-aircon og P1.80 sa aircon.
Dili usab tugotan pagsakay kadtong 21-anyos ug paubos; 60-anyos ug pataas; mga mabdos, masakiton; ug kadtong wala'y mask.
Matod ni Montealto, mas mahal itandi sa regular nga pletihan ning magdagan nga pampubliko nga sakyanan sa GCQ tungod ka daghang requirements nga ipatuman sa operators ug drivers.
Usa na niini ang thermal scanner, kinahanglan mag-mask ang driver ug konduktor, naay footbath dapat ang entrance sa bus, kinahanglan i-disinfect ang bus, ug aduna'y handwashing facility ang terminals. Magpabilin usab nga 50 porsyento ra ang maximum capacity sa bus atol sa GCQ gikan sa orihinal nga kapasidad niini.
Mamahimo na usab nga makadagan ang Transport Network Vehicle Service (TNVS) ug mga taxi kon motuman kini sa guidelines sa LTFRB ubos sa memorandum circular 2020-018.
Usa niini nga kinahanglan nga cashless na ang bayad niini.
Mamahimo lang makabiyahe kadtong mga TNVS operators nga aduna'y valid certificate of public convenience (CPC) ug provisional authority nga giisyu sa LTFRB.
Alang sa TNVS, gikinahanglan nga ang booking ug pletihan niini, ipaagi og online ug electronic payment. Kinahanglan usab aduna'y valid nga CPC ang taxi operators.