NAHILAKIP ang dagkong umaabot nga mga tahas sa Filipino world champions nga sila si Johnriel Casimero ug Jerwin Ancajas sa labing atangan nga mga away sa pag-abli'g balik sa boxing promotions sa Las Vegas, USA.
Si Casimero, kinsa maoy naggunit sa World Boxing Organization (WBO) bantamweight title, gikatakda ng makigharong kang Japanese Naoya "Monster" Inoue sa usa ka unification bout.
Si Inoue maoy naghupot sa International Boxing Federation (IBF) ug World Boxing Association (WBA) bantamweight belts.
Sa iyang bahin, si Ancajas nakatakda ng modepensa sa iyang IBF super flyweight title batok kang Mexican Jonathan Rodriguez.
Ang gikaintapang Casimero-Inoue bout orihinal nga gikatakda niadtong Abril 25, 2020 apan nauswag kini sa wala pa matino nga petsa gumikan sa hulga sa coronavirus disease 2019 (Covid-19).
Si Top Rank boss Bob Arum seguradong makasinati og malisod nga pagsuway sa pagbuhi ning maong mga away apan gilauman nga masugakod ra kini sa beteranong promoter.
Gipahibalo sa Nevada State Athletic Commission nga Ilang giaprubahan ang duha ka contact sports promotion karong Hunyo, 2020, usa kang Arum ug laing usa kang Ultimate Fighting Championship (UFC) president Dana White.
Magsilbe kining testing ground kon unsaon pagpahigayonang contact sport sa Las Vegas nga maseguro gihapon ang kaluwasan taliwala ning padayong hulga sa Covid-19.
Si Arum andam mosugal sa pagpahigayon og boxing promotion nga wala'y tugtan nga mga tumatan-aw sa venue.
Human nauswag ang ilang away, si Casimero nagpabilin ra sa Las Vegas samtang naghuwat kon kanus-a mapahigayon ang ilang away ni Inoue.
Si MP Promotions President Sean Gibbons nagkanayon nga naghuwat na lang sila nga matatakan sa US Embassy sa Japan ang passport ni Inoue aron makabiyahe na kini paingon sa Amerika. Kon makabiyahe na si Inoue paingon sa Amerika, hayan ihan-ay na ang petsa sa ilang away ni Casimero, posible karong Hulyo.
Si Ancajas hinayhinay lang unang nag-ensayo samtang naghuwat siya kon kanus-a siya makabiyahe sa Amerika.
Mao sab kini ang sitwasyon sa iyang kontra. Matod ni Ancajas, kasamtangang naa pa sa 75 percent ang iyang training.
Giklaro ni Ancajas nga dili pa siya mohunat sa pag-ensayo sa kahadlok nga masobrahan sa training. (ESL)