KAPATAGAN, Digos City -- Selos ang gitudlong motibo sa Digos City Police Office (DCPO) human nadunggaban sa iyang kapuyo ang 23-anyos nga babaye sa Purok Mabuhay, Barangay Kapatagan ning siyudad.
Ang suspek nakit-an nga wa na'y kinabuhi didto sa tugkaran sa iyang panimalay alas 7 sa buntag, Dominggo, Mayo 31, 2020.
Sa impormasyon nga gipaguwa sa DCPO, banda alas 7 sa gabii, Sabado, Mayo 30, nasayran nga giadto ni Rosalito Dabalos Andrade, 31, panday, ang iyang kapuyo nga si Jame Rose Saquido, 23, didto sa JB Sari-Sari Store diin nag-trabaho ang biktima.
Sumala ni Lieutenant Colonel Vici Anthony Tababa, hepe sa DCPO, wa'y daghang rason nga gidunggab sa suspek sa makadaghang higayon ang iyang kapuyo ug daling nadala padung sa bay tambalanan.
Human sa insidente paspas nga midagan ang suspek padung sa ngitngit nga parte sa usa ka plantasyon sa sagingan.
Naglusad dayon og hot pursuit operation ang kapolisan aron masikop ang suspek apan wala nila kini nakit-an.
Alas 7 sa buntag nianang pagkaugma, nangayo og responde ngadto sa Kapatagan Community Police Assistance Center (CPAC) ang igsuong babaye sa suspek human iyang nadiskubre nga nagbuy-od nga wa na'y kinabuhi didto sa ilang tugkaran si Andrade.
Atol sa gihimong imbestigasyon sa Provincial Crime Laboratory Office, narekober nila ang kitchen knife sa posisyon ni Andrade, kinsa aduna'y samad dinunggaban sa iyang tiyan.
Di pa masulti sa kapulisan sa Digos kon nag-unay ug dunggab sa kaugalingon ang suspek diin gituohang posibleng selos ang ugat-hinungdan sa kremin.
Padayon ang gihimong imbestigasyon sa kapulisan sa kaso.