UPAT na lamang ka mga quarantine control checkpoints ang gipahimutang sa lalawigan sa Misamis Oriental.
Ang mga checkpoints nahimutang na lamang sa lungsod sa Lugait, Opol, Tagoloan, Magsaysay.
Samtang adunay mga augmentation nga gihimo sa kapulisan sa Balingoan Port ug sa Laguindingan Airport.
Kini ang gibutyag ni Police Lieutenant Theofratus Pia, kinsa spokesperson sa Misamis Oriental Provincial Police Office, samtang ubos na sa modified general community quarantine ang lalawigan sa Misamis Oriental.
Matud niini nga smooth ang dagan sa trapiko ug sa checkpoints sa unang adlaw sa pagpatuman sa MGCQ ug tungod kay tanan gitugotan naman sa pagbiyahe. Iyang gihangyo lang nga unta magsunod sa mga gabayan kanunay sama sa hans washing, pagsul-ob og facemask, pag obserbar sa social distancing.
Gipasabot lamang niini nga gibantayan nila ang tao nga mosulod sa lalawigan labina kung nagikan sa mga lugar dinhi sa Mindanao nga adunay mga tag-as og kaso sa Corona Virus Disease ug dili pa ubos sa GCQ.
Sa checkpoints, ila kining pangayoan og travel authority ug mga requirement sama sa sertipikasyon nga nakacomply og 14 day quarantine ug negative ang covid test.
Susama gihapon ang ilang pangitaon nga requirements sa mga locally stranded individuals lakip mga returning overseas Filipino workers nga gikan sa lain laing rehiyon labina niadtong adunay mga tag as og kaso sa Covid.
Panawagan ni Pia sa katawhan mao ang kooperasyon.
"Ginahangyo nako ang kooperasyon ug kinahanglan ilang pagsunod sa kamandoan sa National kay kini alang sa atong kaayuhan to fight this Covid ug dili na kita mobalik pa sa GCQ. Kinahanglan sundon ang tanan health protocol ug extra careful kay dili nato makita atong kalaban, kinahanglan magmatngon ug mag-amping niini ug sundon ang gipahibalo sa DOH," matud ni Pia sa Superbalita Cagayan de Oro.