Travel pass dili na kinahanglan sa pagbiyahe sa Misamis Oriental

GIPASABOT ni Atty. Jeffrey Saclot, ang spokesperson sa Misamis Oriental Provincial Task Force for Covid-19, nga karon nga ubos na sa modified general community quarantine ang Misamis Oriental, dili na kinahanglan ang travel pass.

Kini tungod kay mahimo naman ang bisan kinsa nga makabiyahe samtang ubos sa MGCQ apan kinahanglan lamang nga nakatuman sa insakto nga guidelines.

Atol sa iyang live nga programa matag adlaw, gipasabot ni Saclot nga dili kinahanglan ang travel pass kung mobiyahe sulod lamang sa lalawigan sa Misamis Oriental lakip sa Cagayan de Oro sugod sa Hunyo 1 paingon sa Hunyo 15.

Gipaabot pa usab nila ang guidelines sa Philippine National Police (PNP) ug Department of the Interior and Local Government (DILG) labina nahisgotan man nga kinahanglan ang travel pass kung mogawas na sa usa ka lalawigan ug mobiyahe paingon sa lain nga lugar o lalawigan.

Samtang ubos na sa MGCQ ang lalawigan, gitugotan ubos sa niini ang social gatherings susama sa pagsimba, birthday ug uban pang selebrasyon sa kondisyon nga 50 porsiyento lamang sa kapasidad sa isa ka tigumanan ang tugotan nga makasulod o makatambong. Kini nagpasabot nga kung 100 ang kapasidad sa simbahan, kinahanglan 50 lamang katao ang makasulod.

Wala pay mass gathering sa mga estudyante, susama sa pagtungha sa klase sa mga tulunghaan nga gitugotan.

Bukas na usab ang sagad sa mga tindahan ning panahona, susama sa restaurant, hardware, hotel, bar, cafes, gym, spa, barber shop, ug salon sa kondisyon nga 50 porsiyento pa gihapon sa kapasidad ang makasulod. Lakip niini mga mall ug shopping center.

Gitugotan na usab ang sports enthusiasts sa ilang fitness activities, apan limitado lamang sa non-contact events, susama sa tennis, badminton, skateboarding, equestrian, jogging, running, biking, golf, ug swimming apan ang basketball gidili.

Sugod usab karong adlawa, gitugotan na mag-operate balik ang construction projects pribado man o gobyerno. Bisan mga tourist destination, travel agencies, tour operators, reservation service, karaoke bars, sinehan, libraries, museum, cultural centers, ug legal nga pasugalan.

Gihangyo lamang ni Saclot ang katawhan sa lalawigan nga samtang gihugakan ang mga bulohaton sa gawas ug sa mga establismento dili kalimtan ang pagsunod sa mga naandan nga health guidelines sama sa pagpanghugas sa kamot, pagsul-ob og facemask, ug social distancing kung makagawas sa puloy-anan.

Related Stories

No stories found.
SunStar Publishing Inc.
www.sunstar.com.ph