USA ka bag-o nga positibong kaso sa coronavirus disease (Covid-19) ang natala lukop lalawigan sa Sugbo Lunes, Hunyo 1, 2020.
Kini maoy resulta sa Covid-19 test sa gisumiter nga mga swab samples sa Probinsya sa Sugbo sa Vicente Sotto Memorial Medical Center (VSMMC), ang sub-national laboratory sa Central Visayas.
Mao kini ang gipahibaw ni Gobernador Gwendolyn Garcia atol sa press conference sa Kapitolyo.
Ang nagpositibong kaso gikan sa lungsod sa Ronda.
Wala pa mohatag og dugang detalye si Garcia labot niini.
Samtang tagsa ang natala nga nagpositibo sa repeat test gikan sa lungsod sa Minglanilla ug Carmen.
Gawas sa mga positibong kaso, natala usab ang duha ka mga indibidwal nga nakasinati og severe acute respiratory illness (Sari) samtang 40 ang nakasinati og influenza like illness (ILI).
Sa kinatibuk-an, moabot na sa 163 ka mga kaso ang natala sa lalawigan sa Sugbo. (ANV)