NADUGANGAN og 12 ka mga kumpirmado nga nagpositibo sa coronavirus disease (Covid-19) sa Dakbayan sa Lapu-Lapu Lunes, Hunyo 1, 2020, pahibawo ni Mayor Junard Chan pinaagi sa iyang Facebook page.
Napulo sa nagpositibo taga Zone 2, Barangay Buaya samtang ang usa taga Barangay Poblacion ug laing usa sa Barangay Mactan nga gikatahong namatay.
Mitala na ngadto 105 ang confirmed cases, 44 ang naka-rekober samtang mitala na ngadto sa walo ka tawo ang namatay.
Sigon ni Chan nga bisan pa anaa na sa general community quarantine ang Dakbayan sa Lapu-Lapu, magpadayon unta gihapon ang mga residente sa pagtuman sa mga precautionary measures aron malikayan ang Covid-19.
"Atong ipadayon ang paghugwas sa atong mga kamot, pagsul-ob og facemask sa kanunay ug pagtuman sa social distancing. Atong idungan ang atong tim-os nga pag-ampo ngadto sa labawng makagagahom sa dali nga recovery sa atong mga kaigsuonan nga tua sa atong isolation facilities ug sa mga tambalanan," sigon ni Chan sa iyang Facebook page. (FVQ/JGS)