TINGUHA ni American Errol Spence Jr. nga angkunon ang tanang mga titulo sa welterweight division diin prayoridad niyang unahon og ilog mao ang World Boxing Association (WBA) nga gipanag-iya ni Filipino boxing icon Manny Pacquiao.
Si Spence, 30, kinsa maoy tag-iya sa International Boxing Federation (IBF) ug World Boxing Council (WBC) welterweight belts, nagtinguha sab nga moilog sa korona ni World Boxing Organization (WBO) welterweight king Terence Crawford.
Gusto sab niyang kontrahon ang world title contender Danny Garcia.
“My realistic goals are Danny Garcia, Pacquiao, and Terence Crawford,” matod ni Spence, kinsa adunay 26-0, 21KOs nga rekord, nga napatik sa www.boxingscene.com.
“Or, Pacquiao, then Terence Crawford. That’s my goal.”
Si Spence nakatakda untang modepensa sa iyang mga bakus niadtong Oktubre, 2019 batok kang Garcia apan wala kini nadayon human siya naaksidente sakay sa iyang awto.
Interesado gihapon si Spence nga makig-away kang Garcia hilabi na kon di mahan-ay ang iyang tinguha nga usahon ang welterweight titles. (ESL)