ANG coronavirus disease 2019 (Covid-19) laboratory sa Mactan-Cebu International Airport (MCIA) hingpit nang nahuman kagabii, Lunes, Hunyo 1,
Andam na kini sa pagproseso sa RT-PCR swab test sa mga manguli sa Sugbo nga overseas Filipino workers (OFWs) ug seafarers.
Gipasalig ni Atty. Steve Dicdican, general manager sa MCIAA, nga andam na nga maka-operate ang RT-PCR lab sa airport gani nadugay kini og usa ka semana tungod sa ubang mga kinahanglan sa maong lab sama sa negative air pressure aron pagpugong sa cross contamination.
Ihiluna ang swab testing booths sa Terminal 2 Arrival Reclaim Area 4, kinsa ang mga bag-ong abot nga OFWs o seafarers muditso sa maong lugar aron mopaubos sa swab test.
Gipasalig ni Andrew Harrison, ang chief executive advisor sa GMR Megawide Cebu Airport Corp. (GMCAC) nga ang maong swab test labing barato ug makuha dayon ang resulta sulod sa 24 oras.
Nagkantidad lang ug P4,500 ang matag swab test.
Dili modawat ang MCIA og bisan unsa nga medical certificate nagpamatuod nga nag-negatibo na sa Covid-19 ang maong pasahero.
Kinahanglan nga mupaubos ang tanang OFWs o seafarers sa swab test aron masiguro nila nga negatibo kini sa Covid-19.
Samtang nagpaabot sa resulta, ilain una ang pasahero sa mga giila nga quarantine facility nga mga hotel sa Overseas Workers Welfare Administration (Owwa) ug Department of Tourism (DOT).
Nagkuha pa ang Prime Care kinsa mag-operate sa laboratory og certification ug accreditation ngadto sa Department of Health ug Research Institute for Tropical Medicine (RITM) alang sa bag-0ng laboratoryo.
Gawas sa Covid-19 laboratory, andam na sab ang MCIA modawat ug mga pasahero ug nagpakatap na sila og karatula sa ilang safety measures nga pagatumanon sa mga pasahero ug mga empleyado.
Gipatuman sa MCIA ang “No Mask, No Entry” policy nga pagasundon sa ilang mga staff ug mga pasahero.
Nagbutang sab sila og mga hand sanitizer nga adunay sensor ug dili na kinahanglan i-pump aron mugawas ang sanitizer apan ibutang lang ang kamot sa ubos.
Aron matuman ang social distancing adunay mga stickers nga gibutang sa sawog nga sundon sa mga pasahero nga maglinya.
Una makasulod aron makacheck-in ipakita ang passport ug plane ticket sa camera screen aron makita sa airport personnel sa pikas screen luyo sa maong camera.
Kini nga pamaagi aron wala nay physical contact ang mga pasahero ngadto sa mga personnel.
Sa pagbutang sa mga bagahe sa scanners aduna gihapoy mga stickers diin adto mutunob ang mga pasahero aron maobserbahan ang social distancing.
Aduna sab silay mga karatula nga nipasalig sa mga pasahero nga ang mga trollies nila i-disinfect matag human ug gamit matag pasahero.
Ang mga counters alang sa pagcheck-in gibutangan nila og flexi glass o sneeze guards aron maprotektahan sab ang ilang nga staff.
Aduna sab silay gibutang nga mga check-in kiosk aron dili na kinahanglan mulinya ang mga pasahero ug oinaagi lang sa pagscan ug QR code mamahimo silang makacheck in gamit ilang cellphone ug dili na sab kinahanglan mutuslok sa maong machines.
Sa waiting area, ang kada lingkuranan gipangpilitan sab og sticker nga dili palingkoran.
Sigon ni Nenette Castillon, ang operations officer sa Terminal 1, nga gitan-aw nila nga magdasok ang mga tawo kung tawagon na ang ilang flight apan aron malikayan ang pagdasok tawagon lang nila kini matag linya o matag seat number.
Adunay safety officers nga magsiguro nga kada pasahero ug staff mosunod sa guidelines gani adunay mga Philippine National Police (PNP) personnel sab nga i-deploy sa airport aron motabang alang sa pagpagaptuman sa sa guidelines sa panglawas. (KFD)