Daghang natanggong sa dan

BISAN GCQ NA: Taas ang kutay sa mga sakyanan nga nanabok sa Sergio Osmena Boulevard sa mga utlanan sa Dakbayan sa Sugbo ug Mandaue sa unang adlaw sa general community quarantine. Bisan kon naa na sa GCQ ang duha ka mga siyudad, naa gihapon ang mga border control ug number coding sa mga sakyanan. Sa unang adlaw, daghang mga trabahante ang natagbaw sa paghuwat og pampublikong mga sakyanan. Estorya sa pahina 2. (Allan Cuizon)
BISAN GCQ NA: Taas ang kutay sa mga sakyanan nga nanabok sa Sergio Osmena Boulevard sa mga utlanan sa Dakbayan sa Sugbo ug Mandaue sa unang adlaw sa general community quarantine. Bisan kon naa na sa GCQ ang duha ka mga siyudad, naa gihapon ang mga border control ug number coding sa mga sakyanan. Sa unang adlaw, daghang mga trabahante ang natagbaw sa paghuwat og pampublikong mga sakyanan. Estorya sa pahina 2. (Allan Cuizon)

DAGHAN ang wa malipay nga mga pasahero atol sa unang adlaw sa general community quarantine (GCQ) kay kasagaran sa mga kawani nga back-to-work na way masakyan.

Daghan ang mga naglinya sa dan sayo sa buntag sa Lunes, Hunyo 1, kay nagtuong dunay pampublikong mga transportasyon, wa diay.

Usa nga nakasinati mao ang government employee nga si Carlo Toleza, kinsa nisayo pa og huwat sa dalan apan way bus o modern jeep ang miagi sa Barangay Tisa, kon siya diin kini nagpuyo.

“Makaingon gyud ko nga lisod gyud kaayo akong nasinati ganihang buntag. Tinood gyud nga ‘struggle is real’ basta paingon na sa trabahoan kay wala gyud masakyan ug walay mga public transport nga nagbiyahe. Daghan ang nagpaabot daplin sa kadalanan,” si Toleza nagkanayon.

Dihang nakabantay siya nga aduna’y free ride, dali-dali siyang nisakay.

“Maayo lang gali nga nakakita ko nga adunay nagbiyahe nga mini bus (free ride), pirti nakong dagan aron makasakay sa mini bus sa among barangay sa Barangay Tisa ug nakasakay intawn ang mga nangatanggong apil na ko ato. Tungod sa akong kasinatian ganiha, nakaingon gyud ko nga mas maayo nga mopalit og bike o motor para service paingon sa trabahoan,” sulti ni Toleza sa Superbalita Cebu.

Naagian sab sa Superbalita Cebu ang gatusan ka mga pasahero sa Pit-os ug Bacayan nga wa makasakay.

Ang Barangay Pit-os maoy huwatanan sa mga lumolupyo sa kabukiran sa northern Cebu City.

Ang Land Transportation Franchising and Regulatory Board (LTFRB) 7 miandam og 17 ka rota sa dakbayan sa Sugbo nga mao ang agian sa bus ug modern jeepney.

Unang padaganon kining bus tungod kay mas dako ang kapasidad, hilabi na nga 50% ra sa orihinal nga kapasidad ang mamahimong masakyan.

Gihulagway ni LTFRB 7 Regional Director Eduardo Montealto Jr., nga “normal” ang nahitabo kagahapon tungod kay mao kini ang pagsugod.

Ubay-ubay na usab silang nadawat nga aplikasyon sa special permit aron makadagan na sa kadalanan sa Sugbo.

Gawas sa special permit sa LTFRB 7 gikinahanglan nga molukat usab og Provincial Public Utility Pass (PPUP) kadtong mga pampubliko nga sakyanan nga mobiyahe hangtod sa lalawigan sa Sugbo.

GAMAY RA SAB

Pipila ka mga bus nga gikan sa dakbayan sa Mandaue paingon sa Cebu City ang wa makabyahe sa unang adlaw sa GCQ.

Matod ni Mandaue City Mayor Jonas Cortes nga ang maong mga bus wa makakuha sa special permit sa LTFRB. (HBL, KFD, PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph