SUPERBALITA CEBU

Mongaya: Nganong lisuron ang pagbangon?

Panahom

DI LALIM alang sa mga negusyante ang walay kita sulod sa kapin sa duha sa bulan samtang padayong nagsuporta sa mga empleyado. Mas sakit kadtong di makalahutay sa pagsweldo ug kinahanglang manaktak.

Ang-ang, wala man say kita. Kalit baya ang pagpahamtang sa quarantine. Daghan ang wala makaandam.

Di na lang kita maglalis kon unsay sakto o sayop sa pagsugod pa lang sa quarantine. Gusto lang ko mopadayag karon sa pangutana kon sakto bang lisudlisoron ang pagbangon sa mga negusyo?

Nakapangutana ko niini kay nakakita ko sa requirements para pag-abli pagbalik sa mga negusyo dinhi sa Syudad sa Sugbo.

Kinahanglan pa diay mosumiter og mga dokumento sa City Hall aron makaabli pagbalik? Buot ipasabot, maghuot tanan sa usa ka dapit? Naghuot man gani ang mga barangay hall sa pag-apod-apod sa mga quarantine pass. Di, maghuot ang City Hall?

Nganong di na lang paablihon diretso ang mga negusyo apan dunay guidelines sa social distancing ug ubang mga lakang pang-hygiene?

Igo na lang mo-inspeksyon ang mga tawo sa kagamhanan. Mas maayo pa gani nga imbes inspeksyon, motabang ang mga team sa kagamhanan nga matarong pagpakanaog ang mga lagda.

Alang kanako, ang tuyo karon mao ang dali nga pagbangon sa ekonomiya sa syudad. Dili pagdali sa pagdako pa sa ekonomiya sa mga opisyal.

Unaha ang pagpabuhi sa mga negusyo aron modako ang ekonomiya sa syudad sa labing madaling panahon.

Alang sa mga kurakot, padak-a una ang ekonomiya aron mas daghan mo og mapig-ot nga duna nay kwarta. Sa pagka karon kay walay mga kwarta ang mga negusyante. Kon hatagan sila og lugway, gani tabangan gyud nga way gasto karon.

Usbon ko, mas importante karon ang pagpabuhi dayon sa ekonomiya. Dungan niini mao ang pagsiguro nga walay second wave sa pagtakodtakod nga mahitabo ug pagbubo dayon sa mga ayuda sa kagamhanan.

Importante sa negusyo nga dunay kwarta ang populasyon aron mopalit. Importante sab nga luwas kitang motrabaho ug mangumpra.

Papel sa kagamhanan nga paspas ug way sami kining mapakanaog. Makasurop sa dugo nga makadungog kita nga dunay tyrannosaurus nga nagnegusyo basi sa atong kalisod.

@anol_cebu sa Twitter


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph