Editoryal: Makalibog

(Editorial Cartoon by Ariel Itumay)
(Editorial Cartoon by Ariel Itumay)

DAGHAN ang naglibog sa mga kamandoan sa mga buhatan sa kagamhanan. Nagsugod pa ni sa miaging semana dihang ang Inter-Agency Task Force on Emerging Infectious Disease (AITF-EID) nipahibawo nga ang Dakbayan sa Sugbo ipaubos sa modified enhanced community quarantine (MECQ).

Apan pagkasunod gabii, si Presidente Rodrigo Duterte nipahibawo nga ang Dakbayan sa Sugbo ug ubang mga dapit sa nasod ubos na sa modified general community quarantine (MGCQ), nga labing lugak sa tanang quarantine level.

Nianang lawom nang gabii, nipahibawo ang Office of the Presidential Assistant for the Visayas (Opav) nga ang AITF-EID nihukom nga ang Dakbayan sa Sugbo ug tanang mga dapit sa Central Visayas ubos na sa GCQ.

Natin-aw ang tanan nianang Sabado, Mayo 30. Ubos na sa GCQ ang Dakbayan sa Sugbo ug Mandaue.

Karon nakamugna og kalibog ang opisyal nga pamahayag sa Land Transportation Franchising and Regulatory Board (LTFRB) 7 nga buses ug modern jeep lang ang makabiyahe. Naa sa memo ni Mayor Edgardo Labella nga mahimo na ang mga PUJ ug taxi nga makabiyahe, apan kinahanglan nga magsubay sa gimbut-an sa LTFRB.

Mas maayo unta kon wa na lang iapil ni Labella paghisgot sa memo ang public transport. Duna intawoy mga dapit sa dakbayan, kansang mga lumolupyo nabawo og huwat nga dunay masakyan sa unang adlaw sa GCQ.

Mas maanindot kon ang City Hall mipakatap sa iyang mga bus aron mahakot ang tanang naa sa karsada. Wa lang usab unta i-limit sa LTFRB ang mga rota, gipadaganan unta og mga sakyanang pampubliko ang tanang naandang rota.

Di baya lalim sa usa ka trabahante ang pagbiyahe ning panahuna nga way habalhabal ug karaang PUJ tungod sa social distancing protocol kay wa silay laing madangpan.

Layo pa unta, giplano ug gipaabot nang daan ang pagbalik sa mga trabahante sa mga trabahoan aron way mag-antos sa dan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph