NILANAT og lima ka oras ug tunga ang paghangyo sa mga rescuer, barangay tanod ug barkada una pa nikanaug sa tower sa National Grid Corporation of the Philippines (NGCP) ang 15 anyos nga dalagita.
Mga alas 8 sa Martes sa buntag, Hunyo 2, 2020, ang dalagita nisaka sa tower sa kuryente nga nahimutang sa Sandayong, Barangay Guadalupe, Dakbayan sa Sugbo.
Matod ni barangay tanod Arwion Ariosa, nag-away ang dalagita ug iyang uyab.
Nianang Lunes sa gabii, Hunyo 1, nakig-inom kini sa iyang mga barkada.
Human mahuwasi, giingon nga nagtuo ang dalagita nga dunay nihilabot kaniya mao nga nisamot iyang kaguol.
Nangabot ang Quick Response Team sa Sugbo (QRT) ug Special Response Unit (SRU) sa Bureau of Fire Protection (BFP) ingon man mga barangay tanod ug mga higala sa dalagita.
Gitabangan siya og alam-alam. Matod ni Ariosa, nga dihang nakombinser, hinayhinay kining nikanaug.
Mga tulo na lang unta ka dupa gikan sa yuta, nihunong kini kay nagkurog hinungdan nga gigakos, gihiktan og pisi sa mga rescuer dayon giabagan pagkanaug.
Gitambagan sa mga opisyal ang dalagita una pa gipapauli sa ilang balay nga duol ra sa tower./GPL
| Sa mga tawo nga giingong suicidal o naay plano mukutlo sa ilang kinabuhi, pwede sila mutawag sa Paglaum hotline sa Vicente Sotto Memorial Medical Center sa kini nga mga number 0939-9365433 o 0939-9375433. Mga trained personnel sa maong tambalanan andam maminaw ug mutambag sa mga gustong mutawag sa maong hotline. |