NIADTONG miaging adlaw, nabalitaan namo nga dunay siyam ka mga nadakpan sa curfew diha sa among silingan nga barangay, ang Barangay San Antonio, sa Agdao District, Davao City.
Sila gidakop tungod kay naglatagaw panahon sa curfew sa maong barangay.
Ang tumong niining pagdakop kanila aron malikay sa coronavirus disease (Covid-19). Imbes malikay sila sa makamatay nga kagaw, gipasalom man hinuon sila sa hugaw kaayo nga kanal sa pulis ug sa ilang barangay kagawad.
Sa pagpasawom nila sa kanal, mas dako hinuon ang risgo nga makabaton og balatian ang mga dinakpan.
Nindot ang tumong sa barangay kagawad nga malikay sa Covid-19, apan di makatawhanon ang ilang gihimo sa mga dinakpan.
Unsa mang balaura ang gibasehan nila sa pagsilot sa mga dinakpan? Kung kamo kahay among pasalumon sa hugaw nga kanal nga walay igong rason, mga sir? Diha kaha mo maghuramentado?
Usa sa mga nisaway sa gihimo sa mga opisyales sa barangay mao si Mayor Sara Duterte-Carpio, kinsa nagsulti nga di makatawhanon ang ilang gihimo.
Gitumbok sa mayor ang Section 8 sa Omnibus Guidelines sa implementasyon sa Community Quarantine sa nasud nga ang lokal nga gobyerno (apil na dinhi ang barangay) giawhag nga mopatuman og mahinungdanon nga ordinansa sa pag-implementar sa curfew apan pinaagi sa patas ug makatawhanon nga pagtratar sa mga malapason.
"Humane ba ang pa-swimingon ang tao, palangoyon ang tao sa kanal? No. It's not humane. What is humane kay gipa-limpyo sila dapat sa kanal," suma sa mayor.
Posible nga bunga ra kadto sa kasuko sa mga opisyales sa barangay, apan kinahanglan nga manubag sila sa ilang nahimo. Ug maayo unta kung tinud-on ni Mayor Sara nga ipatawag niya ang mga responsable.
Sa miaging bulan, nagreklamo usab ang akong amigong sundalo nga nagpuyo sa Barangay San Antonio kay hilabihan kaisog sa mga barangay tanod mga misita kaniya samtang nagpahangin gawas sa ilang balay panahon sa curfew hour.
Maayo gani kay di buringog ang utok sa ilang gisita kay kung naliso pa, aw, basin og napusilan sila.
Akong tambag nila nga mga tinudlo ug pinili nga opisyales sa barangay nga kung naa na kamo sa taas nga ang-ang sa gahom, ilabi na kana nga gahum gikan sa katawhan, mas labaw nga kamo magmapainubsanon.