GIKABUTYAG ni Davao City Mayor Sara Duterte-Carpio nga mo-hire ang kagamhanang lokal ning siyudad og dugang team alang sa tracing ug surveillance nga mga personnels batok coronavirus disease (Covid-19).
Maayo nalang kay sayo nga nadiskubrehan sa otoridad nga kulang diay ang mga personahe nga maoy frontliners niining virus nga hangtud karon nagkataas ang iyang kaso.
"Kinahanglan magdungag og tawo sa tracing and surveillance. If there is a need to hire, mag-hire kita. Sa pagkakaron, augmented ta by Davao City Police Office. Nag-assign gyud sila para sa mga contact tracing teams," sulti ni Mayor Duterte-Carpio atol sa regular nga programa niini sa 87.5 FM Davao City Disaster Radio (dcDR).
Ang tracing ug surveillance personnels sila kadtong mag-monitor sa mga gisuspetsahang naka-contact sa kompermadong nagka-Covid ug mamahimo sila nga maoy mopahiluna sa proseso sa pagdala sa pasyente ngadto sa ospital nga naa sab ang na-assigned nga health personnels.
Gisumpay sab niini nga daghang mga health workers ang nagka-Covid, hinungdan nga migamay sila gumikan gikinahanglan dayon nga ma-quarantine sila kung makitaan og simtomas.
"Daghan sa atong health workers ang naigo sa Covid-19. Isa ka team sila nag-positive sa Covid-19. Luoy kaayo atong health workers. Daghan sa ilaha ang naka-quarantine. Usahay mahutdanay kita og health care workers. Kung dunay mag-positive i-quarantine tanan," ingon ni Mayor Sara.
Sukad Hunyo 1, gianunsyo sa mayor nga naay 306 ka total confirmed cases, 148 active cases, 129 recovered, ug 29 deaths sa Davao City lamang.
Aron mahuman na kining tanan, kitang katawhan di magpabadlong, aron di mabudlay ang gobyerno nga samtang nagsagang sa virus, diha po'y daghang magpabuyag.
Hilabihan ang pagpangita og diskarte karon sa gobyerno aron lamang nga mamahimong luwas ang katawhan, busa di kita magpabadlong, motabang kita pinaagi sa pagpundo sa balay.
Unta makakita na og dugang mga personahe ang gobyerno alang sa pagbatok ning maong virus aron mahaw-as na kita sa magdul-an tulo ka bulan na nga quarantine.