Karne gikan sa lugar nga may ASF gikumpiska

PANABO CITY, Davao del Norte -- Nagpahigayon og aksyon pinaagi sa pag-imbargo sa mga chorizo, longganisa ug pork lumpia ang opisina sa City Veterinarian didto sa Barangay Quezon, siyudad sa Panabo.

Matud pa nga ang maong mga produktong karne nga gibaligya naggikan sa lugar nga adunay aktibong sakit sa African Swine Fever (ASF).

Gibutyag nga ang tag-iya sa mga produkto napadad-an na og "notice of final warning' dihang namaligya pa kini sa publikong palengke sa siyudad apan giingong mibalhin pagpamaligya sa balay niini sa Barangay Quezon.

Sumala pa ang maong negosyante posibleng makasuhan sa pagsupak sa Executive Order 16 series of 2020.

Gawas sa maong kalapasan, nakahimo sab kini pagsupak sa Memorandum Order 166 series of 2020.

Gipamahayag ni City Veterinarian Dr. John Rey Bautista nga ang virus sa karne dili sigurado nga nawala bisan og giproseso o giluto ang karne sanglit ang kagaw sa ASF mabuhi bisan sa taas nga temperatura.

Matud pa nga sa higayon nga mukuyanap ang virus, apektado ang mga baboyan, pork processing business ug kompanya sa mga feeds.

Hinuon, ning kasamtangan, wala pay ASF virus nga nakasulod o naka-apekto sa mga baboyan sa siyudad sa Panabo. (Dexter T. Visitacion)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph