BANSALAN, Davao del Sur -- Mas gikalipay sa mga uhaw sa ilimnong makahubog ang pagwagtang sa "liquor ban" bisan og gidili ang pagtagay sa mga pampublikong lugar sanglit sa panimalay lamang kini buhaton.
Dungan niini, gipagula ang pipila ka mga polisiyang gipatuman sa duha ka lokal nga gobyerno sa lungsod ug silingang lungsod sa Magsaysay, Davao del Sur niadtong Lunes, Hunyo 1.
Pormal nga misunod sa deklarasyon ni Presidente Rodrigo Duterte ang mga lokal nga gobyerno sa lalawigan diin wagtangon na ang general community quarantine (GCQ) ngadto sa modified GCQ (MGCQ) ang lugar nga wala nalista nga "high-risk" sa coronavirus disease (Covid-19).
Sa gilagdaang Executive Order (EO) 29 ni Bansalan Mayor Qurina Sarte, nakalatid nga magpabilin ang "stay-at-home policy" alang sa mga wa'y importanteng lakaw, istriktong ipatuman ang pagsul-ob og facemask ug social distancing.
Bisan MGCQ, wa gitugtan ang mga 20 anyos paubos ug 60 anyos pataas nga mogawas sa ilang balay.
Sa balaod sa Inter-agency Task Force on Covid-19, nakalatid nga mahimo ng mogawas ang bisan unsang pangidaron, apan tungod sa kaso sa usa ka relocation site sa Barangay New Clarin sa lugar, diin naggikan ang 30 anyos nga positibo, hinungdan nga miguwa ang polisiya.
Kahinumdoman, gipailawom na sa lockdown ang maong site samtang gihimo ang contact tracing. Ang pasyente naka-isolate na sa Davao City.
Wa sab gisunod ang balaod sa MGCQ nga di na kinahanglan ang mga passes sanglit nagpabilin ang pagdala og mga Quarantine Pass (QP) color coding sa Bansalan Public Market ug gipatumang schedule sa mga makapamalengke gikan sa mga silingang Matanao ug Magsaysay, Davao del Sur.
Pabiling sab nga ipatuman ang curfew hours gikan alas 8 sa gabii hangtud alas 5 sa buntag ug mga manindahay sa merkado kinahanglang mag-sirado alas 6 sa gabii ug moabri alas 6 sa buntag.
Di pa tugtan ang mga selebrasyon nga aduna'y mass gatherings apil ang pagbalik sa mga pagsimba sa tanang relihiyosong sektor sa lugar.
Gidili gihapon ang operasyon sa mga hotels, resorts, hotels, billiard halls ug mga internet café ug mga bars.
Hinuon, mahimo ng modawat og "dine-in" ang mga karenderya ug restaurant apan 50 porsyento lamang ang mahimong makasulod sa establishemento.
Subay sa EO ni Sarte, gidili una ang pag-adto sa dakbayan sa Digos kung wa'y mahinungdanong katuyuan gawas sa mga trabahante nga angayang magpakita lamang sa identification card.
Ang mga mosulod sa lungsod ug mogawas sa lungsod padung sa Digos, kinahanglan sab nga aduna'y barangay certificate aron nga makalusot sa checkpoint sa Barangay Mabuhay, ang entrada ug pagawas nga parte padung sa dakbayan.
Giklaro sa EO nga gidili gihapon ang pag-byahe sa high-risk nga lugar sama sa Davao City ug ugaling mosupak ipailawom gihapon sila sa 14-day quarantine.
Samtang sa lungsod sa Magsaysay, subay sa Executive Order Number 17 nga gilagdaan ni Mayor Arthur Davin niadtong Lunes, ilawom sa MGCQ, padayong tumanon ang mga sanistasyon sa panglawas ug palibot.
Giwagtang sa mayor ang pagdala og travel pass ug QP alang sa mga mobyahe sud lang sa probinsya ug balidong identipikasyon na lamang ang ipakita sa checkpoint.
Si Davin mitugot na sa 50 porsyentong paghimo og religious activities sa tanang sektor. Kinahanglan nga motuman sa health standards ang mga kan-anan, internet shops, tindahan sa ukay-ukay ug uban pa.