BARANGAY tanod namatay human nalatayan sa dump truck sa Lunes sa hapon, Hunyo 2, 2020 sa Brgy. Marmol, lungsod sa Tuburan, Cebu.
Si Dionilo Romero Dauno, 42, biyudo, tanod sa Barangay Tomogpa, namatay diha-diha.
Samtang gitanggong si Jan Epille, 36, minyo, taga Brgy. Olivo, Tabuelan, driver sa Fuso cargo truck.
Tungod sa hitabo, hingpit nga nangailo ang duha ka mga anak ni Dauno, kinsang asawa bag-o ra sab nga namatay.
Si Police Staff Sgt. Mark Joseph Toring, imbestigador sa Tuburan Police Station nga nahinabi sa Superbalita Cebu, nagkanayon nga si Dauno kusog nga nakapadagan sa iyang motorsiklo gikan nangumpra sa lungsod.
Nagdali si Dauno kay layo ang ilang barangay unya nagsugod na sa kilomkilom.
Sa pag-abot sa lugar, siya ni-overtake sa laing motorsiklo nga nag-una hinungdan naigo sa gikasugat nga dump truck.
Dihang natumba ang motorsiklo, siya napasok siya sa ilawom sa truck ug nalatayan.
“Wa niya makarkulo. Naapiki siya pag-overtake unya kusog kaayo iyang pagpadagan. Unya nakabuylo sab ang cargo truck kay tungason ang lugar,” dugang ni Toring.
Dugang ni Toring nga si Dauno nagdali kay magluto pag panihapon sa iyang duha ka mga menor de edad nga anak.
Sumala ni Toring nga bag-uhay lang namatay ang asawa ni Dauno sa sakit.
Dugang ni Toring nga ang operator sa cargo truck nipasalig nga abagahon ang pagpahiluna sa namatay.
Gipahibawo sab sila sa kabanay nga ang operator nipasalig nga siyay mopaeskwela sa duha ka minor nga anak nga pulos na nangailo sa ginikanan.
Sa pagkakaron gitanggong si Epille sa estasyon sa pulis.