SUPERBALITA CEBU

Diputado: Sumsuman sa pagsaway

Cuentas Claras

NAHIMONG sumsuman sa pagsaway sa mga huwes ug mga abogado sa Bohol si BM Ricky Masamayor human nipadayag nga gusto siya makakuha sa lista sa mga abogado ug huwes sa mga kaso sa gidiling druga.

Si Masamayor, chairman sa committee on peace and order sa Sangguniang Panlalawigan (SP) sa Bohol, nipasabot nga gusto lang niya nga motabang sa pagsulbad sa problema sa isyu sa “acquittals” sa mga kaso sa druga.

Nindot unta ang katuyoan ni Masamayor apan daghan ang natingala sa iyang gibuhat.

Sa kataas sa proseso sa kaso sa druga, gikan sa surveillance ngadto sa entrapment o pagdakop, ngadto sa pagsang-at sa kaso ngadto sa paghusay sa kaso, apan didto lang nakasentro ang panan-aw ni Masamayor sa mga abogado ug huwes.

Ngano kaha?

***

Sa akong nahibaw-an, komplikado ang sitwasyon sa kaso sa druga. Daghan ang naapil sa drama, gikan sa Philippine National Police (PNP) ug Philippine Drug Enforcement Agency (PDEA), apil na ang mga barangay tanod ug hasta ang barangay officials. Unya naa pa ang mga sakop sa local media. Dugangan pa sa drama sa PNP ug sa PDEA mahitungod sa ilang ‘assets.’

Usa pa moatubang ang akusado sa abogado. Kon masang-at na ang kaso unya i-arraign ang akusado, usa pa siya makakita sa huwes. Apan didto lang naka-focus si Masamayor sa mga huwes ug abogado.

***

Kon dunay depekto ang proseso sa pagsugod pa lang, pananglit, wala mosubay ang kapulisan o PDEA sa husto nga proseso, klaro na kaayo og unsay dangatan sa kaso. Mahimong ma-acquitted ang akusado o kaha, ma-dismiss ang kaso.

***

Mao usab kini ang gusto mahitabo ni Presidente Rodrigo Roa Duterte (PRRD). Isip usa ka kanhi city prosecutor sa Davao City, nasayod si PRRD og unsay drama sa kaso sa druga.

Mao kini hinungdan nga bisan sa kampanya pa lang, nangayo si PRRD og unom ka bulan nga sulbahon ang problema sa gidiling druga. Bisan pa sa tanang gihimo ni PRRD, miangkon siya nga dili niya masulbad ang problema sa druga sulod sa iyang termino.

Daghan ang gihimo ni PRRD apan kawang lang ang tanan, gani, nagpista pa ang CHR tungod sa hitak sa wala ug tuo nga patay. Pakyas si PRRD mao nga hangtod karon, padayon pa gihapon ang negosyo sa druga og padayon sab ang kagamhanan sa paglutos sa mga badlungon.

Apan si BM Masamayor, diretso dayon sa iyang solusyon – lista sa mga abogado ug huwes. Susmariyosep.

***

Ang Bohol SP dunay gigahin nga 24 milyones alang sa pagpalit og bag-o nga mga service vehicles para sa board members. Nasayod ang katawhan nga naglisod ang panudlanan sa probinsiya sa mga panginahanglan sa Covid-19, mao man gani nga nagpadayag si Gov. Art Yap sa plano nga mangutang og pipila ka milyones alang niini.

Apan walay bisan usa sa boardmMembers nga gusto gamiton ang maong kantidad para sa Covid-19, bisan pa kon gisugyot na kini sa acting vice governor.

Ngano kaha? Unsay mas importante, ang personal nga panginahanglan sa board members o ang interes sa katawhan?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph