NAPULO ka mga bag-o nga positibong kaso sa coronavirus disease (covid-19) ang natala lukop lalawigan sa Hunyo 2, 2020.
Kini maoy resulta sa Covid-19 test sa 190 ka mga swab samples nga gisumiter sa probinsya sa Sugbo sa Vicente Sotto Memorial Medical Center (VSMMC) ang sub-national laboratory sa Rehion 7.
Mao kini ang gipahibaw ni Gobernador Gwendolyn Garcia atol sa press conference sa Kapitolyo.
Ang mga nag positibong kaso gikan sa Dakbayan sa Talisay, lungsod sa Minglanilla, Bogo ug Consolacion.
Unom ang nadugang sa lungsod sa Minglanilla, duha sa Bogo, usa sa Consolacion ug usa sa dakbayan sa Talisay.
Wala pa mibutyag si Garcia sa detalye sa mga positibong kaso.
Tulo usab ang natala nga nag positibo gihapon sa repeat test gikan sa lungsod sa Minglanilla ug San Fernando.
Gawas sa mga positibong kaso, natala usab ang 16 ka mga indibidwal ang nakasinati ug influenza like illness (ILI).
Sa kinatibuk-an moabot na sa 173 ka mga kaso ang natala sa lalawigan sa Sugbo./ANV