MISAAD si Lapu-Lapu City Mayor Junard Chan nga mohatag og ganti sa makahatag og inpormasyon labot sa gihulagway nga dummy account sa Facebook.
Ang maong peke nga account nga gipanag-iya sa usa ka Neoly Shieve, nagpa-ilang taga-dakbayan sa Lapu-Lapu nga giingong nag-post og pagpangdaot batok ni Presidente Rodrigo Duterte.
Apan sa pagsusi, gikataho nga peke ang maong account gumikan kay dili makita ang impormasyon sa tag-iya niini diha sa maong social media site gawas sa hulagway sa usa ka babaye.
Wa madugay giilisan na sa picture sa usa ka lalake, dihang nanawagan si Chan sa pag-ila sa admin niini.
Nasagmuyo ang mayor sa binuhatan sa admin sa maong FB sa mga birada niini batok ni Duterte ilabi na nga way igong basehanan.
Lakip sa gipost sa account mao ang pagsaway sa pagdumala ni Duterte sa nasud.
Gihimug-atan ni Chan nga sayod siya unsa kalisod ang tahas sa presidente hilabi na niining krisis nga atong giatubang sa pagkakaron apan adunay pipila ka mga indibidwal nga sayon lang ang pagbugal-bugal ug pagdaot sa presidente.
Wala mobutyag si Chan sa kantidad sa iyang reward money alang niadtong makasulti kaniya kon kinsa ang tag-iya sa naasoyng account.
“Kitang tana adunay katungod sa pagpadayag sa atong mga opinyon pero dili nato itugot nga mabastos ang atong presidente tungod sa wala hinungdan nga issue, sayod kita nga walay kinatulgay ug naninguha ang atong presidente para serbisyohan ang kinatibuk-ang Pilipinhong katawhan taliwala sa atong sitwasyon karon,” pagpasabot ni Chan. (GCM)