SUPERBALITA CEBU

Kausaban sa pagpahigayon sa ‘Brigada Eskwela’

File photo

ADUNAY kalahian sa karon nga tuig nga pagpahigayon sa Brigada Eskwela ang naandan nga usa ka semana nga paghimo og preparasyon sa dili pa hingpit magsugod ang klase resulta sa Covid-19 pandemic.

Samtang ang Department of Education (DepEd) Cebu City naka-enrol na og 41,369 ka mga tinun-an para sa kindergarten, elementary ug high school para sa gikatakdang pag-abli sa klase.

Si DepEd 7 Director Salustian Jimenez nipasabot nga inay ang pagpatapok sa mga stakeholders, ginikanan ug mga magtutudlo alang sa himuon nga pagpangandam sa Brigada Eskwela, motutok na sa information drive mahitungod sa kabililhon sa edukasyon bisan pa man niining Covid-19 krisis.

Sa maong paagi, masuta kon unsay dugang gikinahanglan sa matag tunghaan lakip na ng mga angayan ug dili angayan buhaton niining new normal set-up sa pagtungha.

MENU OF NEEDS

“Before ang kinahanglanon is pintal and others. Karon, naa pod tay mga bag-ong list of unsay needs sa school,” matod ni Jimenez.

Gipahinumduman ni Jimenez ang 19 ka school division office sa rehiyon nga moluwat og listahn o “menu of needs” diin ang matag stakeholder masayod kon unsay labing gikinahanglan sa matag tunghaan o tinun-an.

Mamahimong modonar ang stakeholders og masks nga magamit sa kabataan ug magtutudlo, handwashing facilities nga mahimutang sa entrada sa tunghaan nga kompleto sa sanitizers, alcohol ingon man internet connectivity.

Giklaro ni Jimenez nga wa una itugot ang face-to-face enrolment sa unang duha ka semana sa enrolment ning buwan sa Hunyo.

BARANGAY PATABANGON

Siya misugyot ngadto sa mga school administrator nga makig-alayon sa barangay opisyal nga ka-abagan sa pagpang apod-apod pinaagi sa house-to-house alang sa mga enrolment forms ug survey sheets kon unsay ganahan nga mode of learning, sa higayon nga madayon ang klase sa Agosto, 24.

Apan ang desisyon mag-agad sa matag ginikanan kon ilang patunghaon ning tingklase ang ilang mga anak ilabi na niadtong nabalaka sa safety and security sa ilang mga anak diha sud sa tunghaan.

“Kinahanglan na nato i-verbalize ug i-communicate kay usahay basin nakalimtan sa atong mga ginikanan kung unsay importansya sa education. Dili buot ipasabot nga because nag padayon ang klase, naa nay mahitabo nga dautan sa atong mga bata,” dason ni Jimenez.

Gilusad sa DepEd 7 ang two-month long Brigada Eskwela 2020 kagahapon, Hunyo 2 pinaagi sa virtual launching.

MGA NAKA-ENROL

Sa laing bahin, si Superintendent Rhea Mar Angtud nagkanayon nga ang ubang year level aduna na silay pre-enrolment ug ang pagbahin-bahin nalang sa maong mga tinun-an alang sa sectioning.

Gipadayag ni Angtud nga ang 41,369 nga gidaghanon sa mga nakapa-enrol na gilangkuban sa mga tinun-an sa Kinder, Grade 1, Grade 7 ug Grade 11.

Niadtong Mayo 11, ang Inter-Agency Task Force para sa oubreak sa Coronavirus naaprobahan sa ilang resolution nga naglatid sa pagsugod sa school year 2020-2021 karong Agusto 24.

Si DepEd Secretary Leonor Briones nisiguro nga ang tanang tunghaan mosunod sa safety protocol nga gilatid sa Department of Health.

Ang mga opisyal sa DepEd una nang niingon nga sa pagsugod sa abli sa klase, di kinahanglan nga ang presensiya sa bata naa sa mga eskwelahan.

Si Presidente Rodrigo Duterte, nipadayag nga walay face-to-face classes tali sa mga tinun-an ug magtutudlo hangtod nga walay bakuna para sa Covid-19.

Sa Cebu City adunay 1,129 ka aktibong kaso sa Covid apan anaa na silang tanan sa Barangay Isolation Center, samtang niabot na og 1,160 ka mga tawo ang nangaayo sa maong virus ug silang tanan gitagaan og tag 25 kilos nga bugas humay sa City Government. (WBS, PAC)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph