GIHATAGAN ni Mayor Edgardo Labella og tag usa ka sakong bugas humay ang 1,000 ka mga PUJ driver sa Dakbayan sa Sugbo.
Nahukman ni Labella ang paghatag og tag 50 kilos nga bugas sa mga driver human iyang nasayran nga wa sila tugoti sa Land Transportation Franchising and Regulatory Board (LTFRB) nga makapamasahero.
Si City Administrator Floro Casas Jr. nagkanayon nga 25 kilos ra unta ang gitagana para sa mga PUJ driver, apan si Labella ang niinsister nga himuong 50 kilos ang ihatag nga ayuda.
Ang pagpanghatag sa ayuda nga gihimo didto sa ground sa Command Center sa City Hall natumong sa gipatawag nga meeting sa grupo sa mga drayber.
Si Louie Baylosis, kinsa nagmaneho sa PUJ nga adunay route number 09F, nihangop sa paghatag sa ayuda para aduna siyay ikapakaon sa iyang tulo ka mga anak samtang di pa sila kapamasada.
“Pasalamat mi og dako ni Mayor kay dako na kaayo ni og ikatabang sa among pamilya kay wala gyud mi ka-drive rong panahona. Lisod gyud kay ang amo gisaligan ug gibuhi sa among pamilya mao ra gyud ang pag-drive,” padayag ni Baylosis.
Ang Department of Transportation (DOTr), pinaagi ni Assistant Secretary Mark Richmund de Leon, niingon nga delikado sa transmission sa virus ang karaang PUJ lakip na ang habalhabal.
“May old jeepney ba na naka-automatic fare collection? Wala, di ba? Nagpapasahan sila nang barya. Kung ang kasama mo may Covid, siyempre nagpasahan kayo nang barya, very dirty na yong barya tapos may Covid pa, delikado talaga, “ padayag ni de Leon. (PAC)