LAING 165 ka asymptomatic nga mga pasyente sa coronavirus disease (Covid-19) ang naayo o naka-recover sa Hunyo 2, 2020.
Gumikan niini, nahimo nang daghan ang nangaayo sa Covid kon itandi sa mga tawo nga kasamtangang aduna pay virus.
Sa kinatibuk-an, niabot na og 1,160 ka mga tawo ang nangaayo samtang 1,129 na lang ang naghambin sa maong balatian.
Si Mayor Edgardo Labella nipasabot nga bisan kon adunay bag-ong kaso sa Cebu City, apan haghatag og maayong tilimad-on sanglit paspas ang pagpangaayo sa mga nataptan sa Covid itandi sa mga nasakit sa nakalabay nga duha ka mga semana.
Sa gihapon bisan anaa na sa general community quarantine na ang Cebu City, gidasig gihapon ni Labella ang mga tawo sa di paggawas kon way importante nga transaksyon para paglikay sa peligro.
BAG-ONG MGA KASO
Samtang ang City Health Department nakarehistro og dugang 89 ka mga kaso sa Covid-19 sa dakbayan nga gikan 20 ka barangay nga aduna nay daang mga kaso.
Ang bag-ong mga kaso nagagikan sa Barangay Basak Pardo (1); Bulacao (1); Calamba (8); Camputhaw ( 1); Capitol ( 1); Carreta (1); Duljo (7); Ermita (23); Sawang Calero (1); Kinasang-an (1); ug Labangon(2). Naa say Lahug (1); Mabolo (9); Mambaling (5); Punta (1); Sambag 2 (5); Sambag 1 (1); Suba (2); Tejero (15); ug Pasil (3). (PAC)