SA IKADUHANG adlaw sa general community quarantine (GCQ) sa Dakbayan sa Mandaue, daghan gihapong mga lumolupyo ang nag-atang og bus sa stops duol sa Mandaue City Public Market, Martes, Hunyo 2, 2020.
Matod ni Atty. John Eddu Ibañez, executive secretary ni Mandaue City Mayor Jonas Cortes, nga nakig-alayon na sila sa management sa Ceres Bus Liner nga magpadagan og daghang mga bus duol sa merkado.
Bisan sa wa pa nag GCQ ang dakbayan, daghan na ang maglinya sa A. del Rosario st. atubangan sa Suson Lumber, matod ni Ibañez.
Sagad ani nila gikan pa nangumpra sa merkado.
NAGHUWAT
Si Eliotera Ybanto, 52, taga Barangay Tabok, Mandaue CIty, kuyog sa iyang silingan nga usa ka senior citizen nga si Theodora Samaco, 69, duha na ka oras nga nagpaabot og bus paingon sa ilang gipuy-an.
Sila si Ybanto ug Samaco gikan sa Mandaue City Tourism Office aron magkuha sa ilang certificate aron makauli sa ilang probinsya.
Si Ybanto lumad nga taga Negros Occidental samtang si Samaco lumad nga taga Leyte.
Nipaambit sab sila sa Superbalita Cebu nga naglakaw ra sila gikan sa ilang balay paingon sa Tourism office tungod kay way mga bus nga moagi sa ilang dapit.
Si Jenny Lyn Bate, 33, usa ka barangay worker sa Pagsabungan, niingon nga naglakaw ra sab siya gikan sa ilang barangay paingon sa Mandaue City Hall kay aduna siyay tuyo. Waay bus nga miagi sa ilang lugar.
Human niya niadto sa city hall, nagpaabot siya og usa ka oras sa bus nga iyang sakyan.
Nanghinaot siya nga pun-an pa ang mga bus aron makapasakay og daghan ug di na magpaabot og dugay ang mga pasahero.
Sa pakighinabi sa Superbalita Cebu, si Ibañez niingon nga sa ikaduhang adlaw sa GCQ, adunay 50 ka mga bus ang giparuta sa dakbayan sa Mandaue ug kasikbit nga mga siyudad ug lungsod.
Giklaro ni Ibañez nga gianam-anam lang og padagan sa ang mga bus hangtod kini nga mu-full operation ug maabot na sa 120 ang modagan sa dakbayan.
Gipasabot sab niya nga mas gipili sa dakbayan nga mubyahe ang mga bus kumpara sa mga jeep aron matuman ang social distancing. (KFD)