MAKAPAULI na ug mas sayon na nga makalabang sa borders sa lalawigan sa Sugbo ang tanan nga mga kawani nga nagtrabaho sa dakbayan sa Sugbo sugod sa Hunyo 3, 2020.
Kini subay sa kamandoan ni Gobernador Gwendolyn Garcia nga nalatid sa iyang giluwatan nga Executive Order (EO) 17-D.
Sanglit gipaubos na sa general community quarantine ang dakbayan sa Talisay ug Sugbo, ipatuman na ang mas luag nga pag-agi sa mga empleyado.
Apan sa nasabutan sa kadagkoan sa lalawigan atol sa ilang tigom sa miaging semana, gikinahanglan nga magdala lang og company identification (ID) cards o ba kaha certificate of employment (COE).
Ipakita kini sa border checkpoints sa Dakbayan sa Talisay sa habagatan; Dakbayan sa Mandaue sa amihanan; ug Balamban sa kasadpan aron makaagi.
Sa Talisay, mahimo na nga makalusot sa duha ka mga agianan human gilibkas na ang one entrance policy sa Cebu South Coastal Road (CSCR).
Sugod sa Hunyo 2 sa kaadlawon, gibuksan na ang dan sa Natalio Bacalso Avenue sa Barangay Bulacao nga nag-utlan sa Dakbayan sa Sugbo ug Talisay.
Gilatid sa EO 17-D ang kadtong mahimong makalabang sa mga border sa lalawigan sa Sugbo nga mao ang mosunod:
* Health ug emergency frontline service personnel.
* Opisyal sa gobyerno ug government frontline personnel.
* Mga indibidwal nga katuyoan mao ang pagpatambal.
* Sugboanon nga paingon sa airport ug gitugotan na nga makabiyahe sa abroad.
* Mga repatriates nga ihatod sa mga kawani sa national government.
* Trabahante ug tag-iya sa mga establisimento nga gitugotan na sa pagbukas.
* Professionals nga gitugotan na sa pag trabaho sama sa abogado, judge, doktor ug uban pa.
Ang tanan nga may tuyo pagpatambal sa syudad kinahanglan nga magdala og medical certificate ug travel pass gikan sa lokal nga kagamhanan kon asa nagpuyo.
Samtang alang sa mga mobiyahe paingon sa paluparan, kinahanglan nga ipresentar ang kompirmado nga travel tickets sa checkpoint.
Bisan pa man sa pagpaluag sa border controls sa Lalawigan, gipahibawo ni Garcia nga gidili gihapon ang paglaag, outing, o pagbakasyon.
Sa pagsuwat niining balita, wa gihapo’y tubag nga nadawat ang Kagamhanan sa lalawigan sa Sugbo sa appeal niini ngadto sa National Inter-Agency Task Force for the Management of Emerging Infectious Disease (IATF-MEID), pagpaubos na sa Probinsya sa modified general community quarantine (MGCQ).