SAMDAN ang duha ka pulis human gilabayan og granada samtang nagcheckpoint mga alas 7:30 sa gabii sa Hunyo 1, 2020 sa Barangay Cabulohan, lungsod sa Cabanglasan, Bukidnon.
Sa imbestigasyon nasayan nga nagpahigayon og checkpoint ang 1st Bukidnon Police Mobile Force Company sa pagpanguna ni Police Lt. Manolito Elumba Budo dihang giharas sa wala maila nga mga suspetsado.
Samtang ang tropa kamulo og atang sa nasangpit nga dapit kalit lang silang gilabayan og granada sa wala mailang mga lalaki nga sakay sa motorsiklo.
Nakabalos ang kapulisan apan nakasibat ang mga suspetsado paingon sa area sa Barangay Mandaing, Cabanglasan, Bukidnon.
Samdan human naigo sa splinter si PSSG Junmark Suico ug Patrolman Alvin Claunan nga sakop sa 1st Bukidnon Police Mobile Force Company.
Gitambalan na kini sa duol nga balay tambalanan sa dapit.
Ang area gikordon ug gi-clear na usab sa miresponde nga kapulisan gikan sa Cabanglasan Police Station sa pagpanguna ni Police Major Manalo uban ang personahe asa Explosive Ordnance Division.
Si Police Colonel Roel Lami-ing ang Provincial Director sa Bukidnon Police Office nagmando sa kapulisan nga magbinantayon ug imbestigahan pag-ayo ang insidente aron matumbok ang mga suspetsado.
Gihangyo sab niini ang kooperasyon sa katawhan nga kung nakasaksi sa insidente ug nakaila sa mga responsable ipahibalo sa kapulisan.